Online Reporter
Nkosilathi Sibanda
UMHLABELELI wakoBulawayo uBhila usenxuse uzulu ukuthi ngoLwesihlanu kusihlwa abe seNational Art Gallery of Zimbabwe ku-Live Concert yakhe.
Umcimbi lo, womculi olodumo kuleli uBhila, ucelwe linengi labantu koNtuthu labanye abazavela endaweni ezitshiyeneyo abadinga ukuzithokozisa.
UBhila uthe uzilungiselele ngokugcweleyo njalo ufuna abalandeli labo beze ngobunengi ukuzozithokozisa.
“Umcimbi usukhona. Wozani ngobunengi sizoba lobusuku elingasoze libukhohlwe loBhila,” kutsho umculi lo, kungxoxo emfitshane abelayo lephephandaba likazulu.
UBhila wangena kwezomculo esebenza ngokugcweleyo ngo-2023 njalo kusukela lapho usezakhele udumo njengomculi obhala izingoma ezikhuluma ngempilo yabantu, uthando, ukholo, amasiko lezinye indaba ezithinta uzulu.
Umculo wakhe uhlanganisa i-Afro-pop, i-soul lomdumo wakulezinsuku.
Phakathi kwengoma zakhe ezaziwayo kugoqela ezithi: Wamuhle, Emaweni, GP, Lindela, loJikela.
Kulumcimbi wangoLwesihlanu, kukhangelelwe njalo ukuthi acule ingoma yakhe entsha ethi UThixo Uyamangalisa lezinye.
UBhila waphumelela ngo-2025 ngesikhathi egcwalisa iBulawayo Theatre emcimbini wakhe wokuqala eyedwa. Waphinda wavalelisa umnyaka ngokuthola umvuzo weBulawayo Arts Award for Outstanding Alternative Music.
Ekhuluma ngempumelelo yakhe, umculi lo wathi kunengi akufunda kumcimbi wakhe wakuqala njalo ufuna ukulungisa lokhu ngoLwesihlanu. Uthe umcimbi wakhe wokuqala wamfundisa ukuthi abantu bakoBulawayo bazimisele ukusekela abaculi bakulelidolobho.
UBhila usekhulise udumo lwakhe ngokusebenza labaculi abanengi lokuphatheka kweminye imcimbi emikhulu. Usanda kuvela kuShoko Festival lapho okubikwa uvuthise inkundla, kwajabula abanengi.
Uke waqhunsa njalo kuSylent Nqo Country Tour, waphinda waya eSouth Africa lapho avulela khona uPhila Dlozi kuKhandlela Tour.
UBhila uthe lokho kumenze waba lolwazi olunengi.
Amathuba okucula ngaphandle kwakoBulawayo amnike isikhathi sokufinyelela abalandeli abatsha, njalo uthe impendulo ayitholayo imnike amandla okuqhubeka lomcimbi wakhe wokucula eyedwa kuBhila Live in Concert.
UBhila ukhangelele ukuletha abantu abedlula 1 000 kulumcimbi. Ithemba lakhe yikuthi abantu bazasekela umculo wakhe njalo banike abaculi bakoBulawayo ithuba lokukhula.
Uzabe esesitejini labanye abaculi abagoqela Mfanomsotho, Vusumuzi, Butholezwe loFab G, phakathi kwabanye, kuthi uLady Tshawe uzabe engumqondisi womcimbi.
