YiNtatheli kaMthunywa
INHLANGANISO yeBulawayo Basketball Association (BBA) isiqinise imizamo yokuthuthukisa indlela onompembe abaphatha ngayo imidlalo ye-basketball, kulandela ukuqhuba izifundo zokuqeqetsha lokuhlola izinga labo ngempelaviki.
Izifundo lezi ezithethe insuku ezimbili, kusukela ngoMgqibelo kusiya ngeSonto, zenzelwe eBulawayo Courtside Dynamics (BCD), njalo zihlanganise onompembe abathole ithuba lokuthuthukisa ulwazi lwabo ngemithetho yomdlalo, indlela yokwahlulela kanye lokuqinisekisa ukuthi izinqumo zabo ziyafanana.
Umongameli weBBA uSinda Mono uthe izifundo lezi ziphumelele njalo ziyingxenye yemizamo yenhlanganiso yokuthuthukisa zonke ingxenye zomdlalo, hatshi ukugxila kubadlali lamaqembu kuphela.
“Bekuyizifundo ezijwayelekileyo kodwa zilenguquko thile elandela okuphawulwa kumithetho yomdlalo umhlaba wonke jikelele. Inhlelo ezinje ziqakathekile ekuthuthukiseni onompembe bethu ngoba umsebenzi wabo uyingxenye eqakathekileyo yomdlalo.
“Kumele siqhubeke sibanika ulwazi oludingakalayo ukuze basebenzise imithetho ngendlela efanayo njalo bagcine izinga esifuna ukulibona emincintiswaneni yethu,” kutsho uMono.
Izifundo lezi bezikhokhelwa nguJoyce Muchenu, owayengumpempe weFIBA kodwa osesebenza njengombalisi wabaqeqetshi beFIBA.
Ukuba loMuchenu, osebenza ngaphansi kwenhlanganiso eqondisa umdlalo we-basketball emhlabeni wonke, kunike onompembe ithuba lokufunda emuntwini ololwazi lokwahlulela imidlalo esezingeni eliphezulu lamazwe.
Kunhlanganiso yeBBA, ukuqeqetsha lokhu akupheleli ekunikezeni onompembe izigaba zamazinga abo, kodwa kuqondiswe ekwakheni iqembu labonompembe abalolwazi, abazethembayo njalo abaqhuba umsebenzi wabo ngokuqakathekisa ukulunga.
Onompembe baqakathekile emdlalweni we-basketball ngoba yibo abanquma ngezijeziso zamaphutha, ukwephulwa kwemithetho, ukuziphatha kwabadlali kanye lezinye izimo ezenzakala enkundleni.
Nxa bengasebenzisi imithetho ngendlela efanayo, kungaphazamisa ukuhamba komdlalo lokuncintisana kwamaqembu.
“Ukungahluleli kuhle kungabangela ukungathembeki emncintiswaneni, kulethe ingxabano phakathi kwamaqembu lobonompembe njalo kuphambanise ukunakana lokusebenza kwabadlali enkundleni,” kutsho uMono.
