Innocent Kurira
UMDLALI wesiswini weHighlanders uMongameli Tshuma uthi sekumphuzele ukungena enkundleni egqoke isikipa samaWarriors njalo uzizwa elephango elikhulu lokuhlohlela ilizwe.
UTshuma, odume ngelithi “Smaller” enkundleni, ukhulume lokhu kulandela ukuthola elinye ithuba lokuba yingxenye yeqembu lamaWarriors elizadlala le-Equatorial Guinea emidlalweni yokudinga ukungena kumncintiswano we-Africa Cup of Nations (AFCON) ka-2027.
UTshuma uthe ujabule ngokubuyela eqenjini lelizwe njalo uzimisele ukusebenzisa lelithuba ukutshengisa ukuthi ulakho ukulenzela okuhle ilizwe.
“Ngizizwa ngilambele ukudlalela ilizwe lokuhlohla, ngasikhathi sinye ngiyajabula. Ngithanda ukubonga uNkulunkulu ngokunginika lelithuba. Ngifuna ukutshengisa engilakho lokwenza konke okusemandleni ami ukuze ngijabulise ilizwe lonke,” kutsho uTshuma.
Uqhubekele phambili esithi iqembu kumele lisebenze gadalala ukuze lithole impumela emihle emidlalweni elandelayo.
“Kumele senze konke okusemandleni ethu ukuze senzele ilizwe okuhle.”
Umdlali lo uthole elinye ithuba lokungena eqenjini ngemva kokuswelakala kukaJonah Fabisch ohlutshwa yikulimala.
UTshuma wayeqale ekhethwe eqenjini labadlali ababesahlolwa ngumqeqetshi uRamon Catala, kodwa wasala lapho kukhutshwa uluhlu lokucina lwabadlali abazamela ilizwe emidlalweni kaLwezi.
Ukulimala kukaFabisch kwavula isikhala esinike uTshuma ithuba lokubuyela eqenjini, njalo lokhu kuyisipho somsebenzi omuhle awenzileyo kuHighlanders kuligi yeCastle Lager Premier Soccer League.
UTshuma usethuthuke waba ngomunye wabadlali abaqakathekileyo eqenjini leHighlanders, lapho atshengisa khona ubungcitshi bokuphathisa abagadli, ukulawula ibhola lokuvula izikhala emuva kwemvimbi.
Ubuciko bakhe sebubangele ukuthi kukhulunywe ngaye njengomunye wabadlali abangaphumelela ukuthola isicoco ku2026 Soccer Stars of the Year.
Lanxa iHighlanders ingazange ihlale isendaweni enhle kunkundla yeligi, uTshuma ngomunye wabadlali abaqhubeke betshengisa izinga eliphezulu.
Osekusele yikuthi akwenze lokhu egqoke isikipa selizwe.
IZimbabwe izadibana le-Equatorial Guinea ngoLwesine eYaoundé, eCameroon, ingakadlali umdlalo wokubuyela ekhaya eNational Sports Stadium eHarare mhlaka 16 Lwezi.
Imidlalo le iqakathekile kakhulu kumaWarriors emizameni yokuthola indawo kumncintiswano we-AFCON ka-2027 ozadlalelwa eKenya, Tanzania kanye le-Uganda.
IZimbabwe yaqala imidlalo yokudinga indawo kumncintiswano lo ngokunqoba iSierra Leone nge 3-2 isemzini, kodwa yalandela ngokunqotshwa yiDemocratic Republic of Congo nge 2-1 eHarare.
Njengoba umjaho wokudinga indawo usavulekile, amaWarriors adinga impumela emihle emidlalweni kaLwezi ukuze aqinise amathuba awo okudlulela phambili. KuTshuma, leli lithuba lokutshengisa ukuthi ubungcitshi bakhe kuHighlanders bunganceda njalo iqembu lesizwe. Lanxa ithuba lokubuyela kumaWarriors lifike ngendlela abengayilindelanga, umdlali lo uthe usekhangele phambili ekusebenziseni ithuba aliphiweyo lokutshengisa ukuthi ulakho ukuncedisa iqembu.
