adminYiNtatheli kaMthunywa
KULISIZINI yeCastle Lager, abathandi benguqu eBeitbridge bazathola ukuzilibazisa ngokubukela ithimu yakulindawo iBorder Strikers idlala lenkunzi zikanobhutshuzwayo wakuleli.
Umqeqetshi walithimu uSaul Chaminuka uthembisa ukuthi uzayiphakamisa inkundla yeDulibadzimu, yazakale ngokuwisa amaqembu amakhulu nxa isizini isivuliwe.
UMthunywa uxhumane loChaminuka phakathi kwaliviki lapho umqeqetshi lo abike ukuba inhloso yakhe ngeyokuthi avuse inguqu yeBeitbridge.
UChaminuka ubike ukuba uzafuna ukudinga abantwana besikolo abalethanta ukuze abumbe iqembu elilakho ukunqoba kuPSL kuminyaka emithathu elandelayo.
“Ngithanda ukudlalisa abafana abasakhulayo ngoba yibo abaphethe ikusasa yenguqu. Okwamanje mina labasekeli bami asikacabangisisi ukuthi sizadinga abangaki.”
UChaminuka uqhatshwe ekuqaleni kwenyanga kaNhlolanja. Umqeqetshi lo usesebenze lamathimu abalisa iCaps United, iZPC Kariba leBuffaloes.
Ukuqhatshwa kwakhe kuBorder Strikers kwabayinhlanhla ngoba umsebenzi lo wawunikezwe uNever Malunga okunguye owancedisa ukuthi ithimu le ingene kuPSL kulisizini. Umqeqetshi lo uleminyaka eyedlula itshumi lasitshiyagalombili ekunguqu.
“Ngiyajabula ukuthi abanikazi beBorder Strikers babone kufanele ukuthi ngisebenze labo. Ngiqala umsebenzi kuleliqembu ngilenhloso yokuthi ngithole usekelo kunengi labalandeli beBorder Strikers. Ukuze ngikwenelise lokhu, kuzamele ngizame ukupheka ithimu idlale inguqu ezawisa amaqembu ayesatshwayo.
“Ngithe ngisayina isivumelwano somsebenzi ngithembise ukuqeda isizini ka2016 sikunombolo ehloniphekayo.”
Online Reporter