admin
YiNthatheli kaMthunywa
UMSEKELI weqembu leHighlanders uMgcini Sibhalo Mpofu useveze ukuthi iqula lenkokheli zalithimu ziphakathi kwetshe lembokodo mayelana lokuqhatshwa kukaAmin Soma-Phiri njalo liyesaba ukwenza iphutha ngokuletha “umlungu’’ ukuthi azokhuza abadlali ngesizini ezayo.
UMpofu uthe kusukela ngoMvulo, i-executive yenze imihlangano eminengi kuhlafunwa udaba lokudinga umqeqetshi omutsha lokudinga icebo lokwehlukana kumbe ukugcina uAmin njengomqeqetshi. Inkokheli le iveze ukuthi uSoma-Phiri usetshiye i-executive idideke ingqondo njengoba sekulabasekeli abakhankasela ukuthi iqembu lingazihluphi ngokudinga umqeqetshi omutsha. Ngokukhuluma kukaMpofu, iqula le-executive lilomthwalo onzima.
“USoma-Phiri loCosmas bayazi ukuthi isivumelwano sethu siphela lonyaka. Umbuzo wokuthi sizabagcina kumbe sizabaxotsha unzima. Njengabakhokheli angikufihli ukuthi sithwele nzima ngokuthi sizathatha inyathelo liphi ngekusasa yabaqeqetshi laba,’’ nguMpofu lo etshela ilizwe kuliviki kuhlelo lweGameOn, kumabonakude kaZBCtv.
UMpofu uqhubekele phambili wazisa abalandeli beBosso ukuthi kungamanga aluhlaza tshoko ukuthi “umlungu” ovela kweleDenmark uErol Akbal usephendukile eZimbabwe ukuzoqala umsebenzi.
UAkbal nguye okukhangelelwe ukuthi athathele uSoma-Phiri umsebenzi ngo2016.
“Umqeqetshi lo okukhulunywa ngaye asikamboni la. Kungamanga ukuthi usebonakele kuHighlanders. Sikhuluma nje ukibo.’’
Kubikwa iHighlanders ifuna ukuqhatsha uAkbal ngoba kasoke afike akhethe iqembu lakhe ngesiphaqa. Ithimu le, ngokubika kukaMpofu, loba kunzima ukutshiyana lo-Soma-Phiri ngemva kwemisebenzi yakhe emihle, isinqumo sokuqhatsha kakutsha sesibotshiwe.
“Loba inyathelo esizalithatha linzima, engikwaziyo yikuthi asibuyeli emuva ngokudinga abaqeqetshi abatsha.Abalandeli bazakwazi ngalokhu kumalanga alandelayo.” Inkulumo kaMpofu iveze ukuthi iqula le-executive liyehlukana ngesinqumo sokuqhatshwa komqeqetshi omutsha.
“Asifuni ukuthi abalandeli bethu basisole futhi. Abalandeli abathi sigcine uSoma-Phiri, yibo njalo ababesithi senze ubuthutha ngokuqhatsha umqeqetshi lo.’’
USoma-Phiri ungene kumsebenzi wobuqeqetshi wafika wayiphakamisa iBosso, ithimu obekungacatshangelwa ukuthi izaqeda umkhankaso weligi yeCastle ikunombolo yesithupha kungalane. Ngaphansi kukaSoma-Phiri, iHighlanders yenelise ukuthwala inkezo yeEasycall ngokunqoba iChicken Inn 1-0. Anduba ifike kulumdlalo, iTshilamoya itshaye iFC Platinum kuhlandla lama-quarter final, yayangisa abafana beDynamos 2-1 eMagumeni. Ukunqoba amathimu womathathu la kukhweze inhlonipho kumqeqetshi uSoma-Phiri ngoba iBosso yavukela amaqembu abonwa ezintshantshu zomkhankaso weCastle. IChicken Inn yizo intshantshu zeligi, iDynamos yaqeda ikunombolo yesibili kuthi iFC Platinum iphethe iligi yeCastle ihlezi kunombolo yesibili.
Online Reporter