admin
Asi Henry, uyo akambotamba nemutambi uyu panguva yavaive kuBarcelona, anofunga kuti chizvarwa chekuSweden ichi chinogona kungomuka chibhebhenenga vanhu vasingafungire.
Achitaura pachirongwa cheMonday Night Football, Henry akati, “Mibvunzo yakawanda yange iri yaJose Mourinho naWayne Rooney asi iye zvino yave kuna Zlatan Ibrahimovic.
“Aka ndekekutanga achizviwana ari panguva yakadai pose paatamba nhabvu.
“Anowanzonwisa chete uye zviri kuitika hatizive zvichiitika kwaari.
“Anofanirwa kuzvigadzirisa. Ndinoziva kuti anokwanisa kuzvigadzirisa asi zvingabatsire kana zvikagadzirika iye zvino nekuchimbidza kwete pasisina nguva.”
Ibrahimovic akatanga zvakanaka hupenyu hwake kuOld Trafford izvo zvakamuona achinwisa kana mumitambo mina yePremier League.
Asi kubva paakanwisa mumutambo weUnited, apo yakakundwa neMan City nguva pfupi yadarika, akangonwisa kamwe chete mumitambo 10.
Paakabvunzwa kuti kusanwisa kwaIbrahimovic kuri kumukanganisa mupfungwa here, Henry akati, “Kunokanganisa, kunyanya panguva iyo chikwata chako chinenge chisiri kuhwina.
“Dzimwe nguva zvakanaka kana ukasanwisa asi chikwata chako chohwina, asi iye anoziva kuti anga achiwana mikana yekunwisa mumitambo mikuru.
“Hongu, zvinomukanganisa asi ndinomukurudzira kuti atambe zvine mutsindo abatsire United kuhwina nekuti mutambi wemhando yepamusoro,” akadaro.
“Zvange zvisiri kumufambira zvaanoda kuUnited nguva yadarika iyi, asi anofanirwa kutsvaga nzira yekunwisa nekuti chikwata chake chinozvida.
“Zvingave zviri kumukanganisa? Hongu, asi munhuwo uye anazvo zvose mupfungwa dzake kuti asimuke kubva paari.” – Sky Sports News.
Online Reporter