adminCornelius Luphahla
IBUTHO leZimbabwe seliveze ukutshisekela ukuthuthukiswa kwabesifazana kuzozonke inhlangothi ukuthi balingane labesilisa.
Imizamo le yokuthuthukiswa kwabesifazana ivezwe nguMajor General Trust Mugoba ekhuluma emkhosini wokuqeqetshwa kwamasotsha eZimbabwe Shool of Infantry, eMbalabala kumaviki amabili edluleyo.
UMajor Gen Mugoba ubike ukuthi abesifazane bakhululekile ukuthi babe yingxenye yebutho lakuleli ngoba behlose ukuthi inani labo lilingane lelabesilisa.
“Ngiyajabula nxa ngibona kulabesifazana abaqeqetshwayo lamuhla njengamabutho eZimbabwe. Ngilesifiso sokuthi ngabe bayanda balingane labesilisa .
“Okumangalisayo yikuthi phakathi kwabafundi abangu-474, abesifazana bangu-19 kuphela. Ngakho ngiyakhuthaza ukuthi ethubeni elizayo abesifazana bengavumi ukwedlulwa ngabesilisa ngenani kubutho leZimbabwe,” kulandisa uMajor Gen Mugoba.
Uqhubekele phambili wakhuthaza izakhamizi zeMbalabala ukuthi nxa bekhona abantwabazo abafuna ukuba ngamalunga ebutho bakhululekile ukuthi babuye kungakhathalekile ukuthi ngabesifazane.
“Zakhamizi zeMbalabala vumelani abantwabenu bengene ebuthweni leZimbabwe. Lingancindezeli abesifazana ngoba labo balalo ilungelo lokuba ngamasotsha njengabesilisa.
“Lani bantwana nxa lifisa ukuba ngamasotsha livunyelwe ngoba ibutho leZimbabwe alilabandlululo, noma ngowesifazana uvunyelwe,” kuphetha uMajor Gen Mugoba.
Online Reporter