admin
UMOYA wengozi womunye unkazana okubikwa ukuthi wayesebenzela esitolo senye indoda yakoGwidibira, eChigodora eMutare kubikwa usuvutha bhe njengomlilo kanye lokubangela ukufa lokugula emulini le.
Indaba yengozi le kubikwa seyafika lasenkundleni yenduna uZimunya lapho osokudingwa isixazululo.
Induna le, uKidben Bvindiri uluqinisekisile udaba lwengozi le okubikwa ngeyomuntu owabulawa ngomnyaka ka1976.
“Indaba zengozi zabantu imimoya yabo esivuka kuzimuli ezababulalayo zigcwele esigabeni lesi.
“Enye yalezi izindaba ngeyentombazana yakoGwidibira koChigodora lapho okubikwa kulontombazana owayesebenza esitolo sabo kudala owabulawa ngabalimuli njalo isidumbu sakhe lalamuhla asikaze sitholakale,” itsho njalo induna.
Uthe udaba lolu lwalethwa enkundleni yakhe kodwa lwamiswa nanko phela izinkundla zavalwa ngenxa yomkhuhlane we Covid-19.
“Abemuli yakontombazana lo beza enkundleni yami bekhala ngomoya wengozi kadade okubikwa wabulawa isidumbu sakhe sayafihlwa egangeni.
“Simelele nje ukuthi umthetho usivumele ukuthi sibuthane sixazulule udaba lolu abathintwa yingozi le babuye sibone ukuthi ifuna kwenziweni ingozi le,” kutsho induna uZimunya.
Uthe amadoda amathathu emulini le okuyibo obaba bemuli yibo okubikwa babulala unkazana lo owayeyisizalwane seMozambique.
“Emulini le kubikwa abantu sebephelile ngokufa, abanye bagula umkhuhlane wengqondo kuthi abanye bahlangana lezinye inhlupho ezitshiyeneyo okubangelwa yingozi le okuthiwa idla amalangabi.
“Abalabantwana abathintekayo kungozi le labanye abafelwayo yibo abeza enkundleni njalo sikhangelele ukuthi sibize imuli yonke enkundleni ukuze silulungisise udaba lolu.
UNkosikazi Lillian Mariya (50) uthi yena wenza okokuthutha emzini wakhe ngemva kokuba umkakhe ebhubhe kubangelwa yingozi le.
“Mina ngabhujelwa ngumkami uWashington Gwidibira ngomnyaka ka2010 ngemva kokuba eqale ukuvuvuka isisu njalo ehlala efikelwa ngumoya wengozi. Ingozi le kubikwa ngeyomunye unkazana owayesebenzela ubabazala wethu.
“Umoya lo wawukhuluma uthi langibulala langicuya laselisiyangilahla egangeni’. Unkazana lo kubikwa wayedabuka eMozambique,” utsho njalo uNkszn Mariya.
Uthe uhlupho olukhona ngolokuthi abadala abaqanjwayo kwathiwa yibo ababulala umntanabantu bala bemba phansi ukuthi bakwenza.
Amazwi kaNkszn Mariya aqinisekiswa nguNkosikazi Linda Goredema ongumalukazana emulini yako Gwidibira ohlala eHarare yena othe usethwele amagabha avuzayo ngenxa yendodana yakhe uJohn Gwidibira (24) evukelwa ngumoya kankazana owabulawa ngobaba balimuli.
“Sengithwele nzima ngengozi yalunkazana ephuma kumntanami ikhuluma ithi ‘langibulalelani? Ngifuna ukuhlawulwa.’
“Umoya lo ungambamba uyagijima adabule impahla akhwele phezu kwezindlu lama-tower light ngendlela eyesabekayo.
Uthe yena lobaba wendodana yakhe uStuart Gwidibira behlukana ngomnyaka ka-2015 nanko phela wayengafuni ukuthi belaphise umntwana. Uthe uyise womntwana uyaphika wemba phansi uthi kibo akulangozi mhlawumbe umfana uziphaquzela imbanje okuyinto emzwisa ubuhlungu unina womntwana.
Intatheli ithinte uMnumzana John Gwidibira ecingweni yambuza ngalindaba yengozi wathi kibo akulangozi.
“Indaba le ekhulunywa ngabanengi ayisiqiniso, ngabe kithi kulengozi ngabe kudala sonke safa phela,” utsho njalo.
Online Reporter