admin
YiNtatheli kaMthunywa
SEKULESIKHATHI eside umgadli weHighlanders uPrince Dube engahlohli kodwa ulakho ukwenza izimanga mhla iqembu leli lidibana leDynamos emagumeni eBarbourfields ngeSonto.
Umdlalo lo ukhangelelwe ngamehlo abomvu ngabalandeli benguqu abafuna ukufakaza ukuthi kulisizini yiphi ithimu enkulu phakathi kwazo zombili. Enkambeni yabalandeli beBosso kulethemba lokuthi iqembu labo lizaphetha liyingqwele kumidlalo yeligi ka2016.
Kuhlandla lakuqala, uPrince Dube walibethela emambuleni ngomzuzu wesi-57th wenza imbali ngokuqeda isiqalekiso seHighlanders sokudliwa yiDeMbare okweminyaka elitshumi. IBosso yayicine ukunqoba iDynamos ngo2006.
UPrince wabayinsika yomdlalo lo ngoba ngaphandle kwebhola alihlohlayo, watshibilika wenelisa ukuphasa amabhola phambili. Ibhola lesibili elahlohlwa nguBruce Kangwa lavela kungcitshi enguPrince.
Lapha kwakuyimpelaviki yamhlaka 28 kuNkwenkwezi enkundleni yeRufaro. Umbuzo okhona ngothi engakwenza na okufanayo kulumdlalo?
Kuliviki iphephandaba likazulu lixhumane lomdlali lo othe ubewulindile lumdlalo.
“Kumele ngihlohle futhi. Bengilungiselela umdlalo njengayo yonke njalo kukhona okungitshela ukuthi ngizadlala ngcono,” kutsho umdlali lo ngoLwesibili ngesikhathi iHighlanders ilungiselela umdlalo omkhulu lo.
Ukubeka egcekeni ukuthi laye kuyamkhathaza ukuthi sekudlule imidlalo eminengi engaliboni igedi. Uthe loba engeke wabaleqiniso lokuthi uzakhethwa eqenjini kumdlalo weDynamos, uyakhuleka ukuthi anikezwe ithuba lokuzitshengisela.
“Abantu sebekhathele ngokubuza ukuthi ngizahlohla nini futhi. Abalandeli bami bengakhathazeki ngoba ngizahlohla ngingaphiwa ithuba.”
Kuqembu leHighlanders elagezisa isiqalekiso seqembu leli ngoNkwenkwezi kwakulo Ariel Sibanda, uBenson Phiri, uFelix Chindungwe, uErick Mudzingwa, uHonest Moyo, uSimon Munawa, uRahman Kutsanzira, uBruce Kangwa, uKing Nadolo loPrince Dube.
NgeSonto kuyaziwa ukuthi uKangwa akekho. Kuzabonakala ubungcitshi bukamqeqetshi uErol Akbay okuzamele akhethe umdlali ozagijima loPrince phambili.
Phakathi kwabadlali abakhona enkambeni, uMthunywa ubika ngokungesabi ukuthi uAkbay usedonsa uAllen Gahadzikwa loNhlanhla Ndlovu.
UNdlovu loGahadzikwa sebengenile ehlelweni lukaAkbay ngokuzitholela umambule kumidlalo emibili edluleyo.
UGahadzikwa wahlohla mhla iBosso idlala leHow Mine kuthi uNdlovu usukumise abalandeli kumdlalo lapho ababedibene leBorder Strikers.
Kungumbono kaAkbay ukuthi uPrince azibonakalise kumdlalo wabo leDynamos.
“UPrince uyazi kamhlophe okumele akwenze. Asifuni ukumfaka umthwalo angeke awenelise. Banengi abadlali eqenjini abalethuba lokuthi benze iqembu liphumelele,” kutsho uAkbay osethole ibizo elithi “uMkabayi” kubasekeli beHighlanders.UMqondisi wezokuqeqetsha uCosmas “Tsano” Zulu uthe ulethemba lokuthi uPrince labanye abadlali abasakhulayo bazajabulisa abantu ngeSonto.
Kusenjalo, iDynamos ingabe ilande into eyodwa eBarbourfields. Iqembu leli lidinga ukuchumisa abasekeli beBosso ngokuyinqoba. Akula umdlalo oqakatheke njengalo kuleli iqembu.
Sekukudala iDynamos yacina injabulo kulisizini, okutsho ukuba ukunqoba iBosso kuyabe kulikhekhe kubafana beDeMbare.
Engalaneni yeCastle Lager iHighlanders ihlezi kunombolo yesithathu ngemiklomelo engu-38. IDynamos iyancenga kunombolo yesihlanu ngemiklomelo engamatshaumi amathathu lanhlanu (35). Ingalane le iveze ukuthi iHighlanders ingayekethisa, iDynamos ingahle isondele esikhundleni sayo kulumdlalo.
Ukunqoba kwayo iDynamos kuzayitshiya izitshaya isifuba, ilethemba lokuthi ingaphenduka embusweni wenguqu yakuleli loba nje isikhatshana lenkezo.
Umqeqetshi weDeMbare uLloyd Mutasa uthi umdlalo lo wahlukile ngakho iHighlanders ingazikhukhumezi.
“Yebo sibili sadliwa kuhlandla lakuqala. Akutsho lutho ngoba lo ngumdlalo esiwulungiselele ngendlela eyehlukeneyo. IHighlanders yisitha sethu sakuqala njalo imidlalo yethu layo ihlala ihlabusa. Sizadlala ngokuzimisela sikholisise ababukeli,” kutsho uMutasa ekhuluma loMthunywa ecingweni.
Nanti iqembu okumele likhethwe nguAkbay: Ariel Sibanda ezintini, uBenson Phiri, iFelix Chindungwe, uErick Mudzingwa, uHonest Moyo, uSimon Munawa, uRahman Kutsanzira, uAllen Gahadzikwa, uKing Nadolo loPrince Dube.
Imidlalo yePSL kulimpelaviki:
NgoLwesihlanu: Chapungu v Harare City (Ascot) Live on Supersport.
NgoMgqibelo: Ngezi Platinum v Bulawayo City (Baobab).
Tsholotsho v Border Strikers (Luveve), FC Platinum v How Mine (Mandava) Live on Supersport.
NgeSonto: Caps United v Chicken Inn (NSS), Hwange v ZPC Kariba (Colliery), Mutare City v Triangle (Sakubva),
Highlanders v Dynamos (Barbourfields) Live on Supersport.
Online Reporter