admin
ZiNtatheli zikaMthunywa
UMMELI wedale lePhalamende eTsholotsho North uSikhwicamfundo Jonathan Moyo uveze ukuthi iqembu likanobhutshuzwayo iTsholotsho Football Club lingcono kakhulu kwezemidlalo kuleqembu leBorder Strikers noma nje kukhona okusilelayo.
Njengoba nje iqembu leTsholotsho lisemuva kakhulu okungadala ukuthi lisunduzelwe ngaphandle kweligi yakumnyaka ozayo, uSikhwicamfundo uMoyo ukhulume lokhu ngenhloso yokunika abadlali baleliqembu ithemba.
Ekhuluma esemhlanganweni lentathelizindaba eBulawayo Press Club uSikhwicamfundo Moyo uchaze ukuthi iqembu leTsholotsho lingcono kakhulu liyenelisa ukumelana lamanye amaqembu emagumeni awo.
“Thina njengeTsholotsho FC singcono kakhulu kwezenguqu kuleBorder Strikers ngoba thina asilaguma lokudlalela kodwa siyake sinqobe amanye amaqembu emagumeni awo.
“Ngabe sileguma lethu lokudlalela ngabe ukudliwa kwethu ngegoli elilodwa (1-0) emidlalweni eminengi kuba yithi esibabhuqayo ikakhulu nxa sidlalela egumeni lethu.
“Ngitsho ngoba siyabe silosekelo olukhulu kakhulu kulanxa sidlalela kwezinye indawo lapho abalandeli beqembu abasuka baswele imali yokugada besiyasekela okuyikho okunika abadlali umdladla wokudlala ngamandla,” kutsho uMoyo.
UMoyo ubuye wathi ukudliwa kweqembu leTsholotsho kumncitsha ubuthongo ezama ukuphuma lamaqhinga okulivikela ekugenqulweni kuligi.
“Ukudliwa kweTsholotsho FC kungincitsha ubuthongo ngoba ngilala ngicabanga amaqhinga okulivikela ukuze ingaze yaqethulwa kuPSL League njengoba sisemsileni nje. Noma kunjalo ngiyazi ukuthi kayisoze igenqulwe ngoba sizaqhubeka siyilolonga ukuze inqobe.
“Okunye njalo sizazama ukuqedisa iguma lethu lenguqu ukuze eminyakeni ezayo senelise ukunqoba njengamanye amaqembu alamaguma awo,” kuphetha uMoyo.
Online Reporter