Online Reporter
Nkosilathi Sibanda
IDOLOBHO lakoBulawayo selisondele ekuqedeni ukwakhiwa kwefekithali yokuthunga impahla ezanceda abesifazane lentsha ukuthi bazithuthukise ngokuzisebenza.
NgoLwesibili kuliviki ikhansili yakoBulawayo yamukele ithimba elivela ku-African Development Bank elize ukuzohlola ukuqhubeka komsebenzi weSustainable Enterprise Development for Women and Youth (SEDWAY) leSkills for Youth and Women Employability and Productivity (SYWEP).
Ikhansili yethule ngokuvakatsha kwezisebenzi ze-African Development Bank, ibika ukuba umsebenzi wokwakhiwa kwefekithali usezingeni eliphezulu.
“I-AfDB ibambisane loHulumende ekwakheni, ekuhloleni kanye lokuqeqetsha abantu abazasebenzisa ifekithali le, etholakala ekhoneni likaBasch Street lo-11th Avenue koBulawayo,” kutsho ikhansili ngoLwesibili
“Umsebenzi wokwakha lo usufike kumaphesenti angu-80, njalo kulindelwe ukuthi ifekithali incede kakhulu abesifazane lentsha abafuna ukusebenza kubhizimusi lokuthunga impahla ngokubanika imitshina yakulezi insuku lokunye okudingakalayo.”
Ikhansili ichaze njalo ukuthi: “Ithimba belihlanganisa iziphathamandla ezivela kugatsha Women Affairs, Community Development, Small and Medium Enterprises Development logatsha lweFinance and Economic Development.
“Umkhokheli wethimba le-AfDB, u-John Ng’ambi, uthe inhlanganiso yabo ifuna ukuthuthukisa amathuba emisebenzi kanye lokuqinisa amabhizimusi aqhutshwa ngabesifazane lentsha.
Ithimba liphinde lavakatshela uSodolobho wakoBulawayo, u-David Coltart, lobambele uMabhalane wekhansili, labanye abaphathi bekhansili.”
Kubikwa uColtart uncome i-AfDB ngokuqhubeka isekela uBulawayo, esithi ubudlelwano phakathi kwedolobho lenhlanganiso le buzanceda njalo kwamanye amaphurojekthi abalisela ukuthuthukiswa kwamanzi ngokwakhiwa kweDamu leGlassblock Bopoma.
