Online Reporter
Ugwalo: Ukuthunjwa kukaSukuzukuduma.
Umlobi: Geshom M. P. Khiyaza
UMjaji inkosi yesigodi saseMzinyathini yayiphethe abantu bayo kuhle. Sithola kulotshwala emzini wayo owawakhelwe eduze lentaba enkulu iMbeka ngaphetsheya komfula uMzingwane. INkosi yayithethe abafazi ababili,
uMaThebe loMaXaba. UMaThebe wayengomdala, uMaXaba engomncane.
UMaThebe wayezele amantombazana wodwa wagcina ngomfana amutha ibizo wathi nguSukuzukuduma. UMaXaba wazibula ngomfana ayeselethemba lokuba njengoba uMaThebe wayelamankazana indlalifa yayizavela kuye kanti wayengabuzanga elangeni. Wakhathazeka sekuzalwa uSukuzukuduma. Indodana yakhe wayeyithe ibizo elithi nguLifa.
Kwakumhla walobotshwala emzini wenkosi lapho uSukuzukuduma anyamalala wathunjwa khona.USukuzukuduma watshiya indawo ayedlalela kuyo nsuku zonke wakhetha ukudinga impoko engena igusu exotshana lemvevane esikha lempoko zezihlahla. UMaThebe wamdinga asadinga waze wamemeza. Wabikela INkosi eyabuthanisa abantu babuzwa ngomntwana kodwa balandula.
Kwakhutshwa ibutho lenkosi ukuba liqaze intaba iMbeka lasemaceleni ayo kodwa abaze bathola lutho. Njengoba babenathile baphonguphumphutha nje. Omunye webutho wabona izixhayixha zempoko ezasezibunile emadwaleni kukhanya ukuba zazidlaliswa lusane. Wabiza inkosi kulawo madwala wayibonisa. Ngeqiniso bakubona ukuba uSukuzukuduma wayeke wadlula lapho.
UMaThebe walala ekhangele lelolanga ekhala. Ekuseni amabutho ayeseqoqwe kudala kanye layo inkosi isivunule ezempi. UMaXaba wayedinga okolunya ethi kungasake kuye ngasifudlana. Babephumula abantu babuye babuyele bayedinga. UMaXaba labanye abafazi bayahlala emkulwini kaMaThebe.
Izulu lalisina njalo likhalima okumangalisayo. Izalukazi zazikhala nxa liduma zikhumbula umntwana osegangeni. Ezinye zaziqhinqa isililo emkulwini ezinye zazikhala izinyembezi zengwenya ukuze zingasolwa ekuthini azilazwelo. Kwakubaswe owekhanka kulindiwe lapha emkulwini.
Endlini yenkosi kwakubuthene amadoda athile etshuka yona le eyokunyamalala kosane. Babeyitshuka bekhulumela phansi. Lathi lisayo baqhubeka njalo ngokudinga. Baya eMzingwane, eMalungwane lakho Mphuphiyababa ngentshonalanga. Babhoda kuzo zonke izindawo kanengi nengi baze bakhathala. Kwezwakala ukuba kwakubonakale izilwane ezimbili, esisikazi lesiduna kulonaleli igusu okwatholakala impoko.
Inengi lakholwa ukuba umntwana wayedliwe yilezozilwane. Basebeze badinwa abantu kungelalutho abalutholayo.
UMaThebe kwabanzima ukuba ibizo lomntwana liphume enngqondweni eseswelakele.Asibali- ke lapho ephakulula ukudla. Kwakungangeni , kungadleki ngokunyamalalelwa ngumntwana ayemthembile.
