Online Reporter
Nkosilathi Sibanda
INHLANGANISO emela amalungelo abadlali bebhola likanobhutshuzwayo eye-Footballers Union of Zimbabwe, isikhuphe umbiko wokuxwayisa amaqembu ukuthi ahlukane lomkhuba wawo wokususa abadlali enhlelweni ngaphandle kokubazisa loba ukuvumelana labo.
Lokhu kuza ngesikhathi amaqembu kumaligi ephakathi kwesikhathi sokuthengiselana abadlali. Kwandise ukuthi kube lamaqembu asuka ephule izivumelwano ezibekiweyo, amanye aqile abadlali imali yabo.
Umongameli weFootballers Union of Zimbabwe uDesmond Maringwa uthe sebefake isicelo sokukhuthaza amaqembu ukuthi enze kuhle.
“I-FUZ isithole imbiko yokuthi amanye amaqembu asusa abadlali kuluhlu lwawo ngesikhathi sefasitela lokuthengwa lokuthengiswa kwabadlali, kodwa engakhulumisananga labo,” kutsho iFUZ.
“Isivumelwano somdlali leqembu singumthetho, ngakho ukususa umdlali ngaphandle kwemvumo yakhe loba isivumelwano phakathi kwenhlangothi zombili kwephula imithetho yeRegulations on the Status and Transfer of Players (RSTP).”
IFUZ ithe ukwenza lokhu kuphazamisa isisindo sezivumelwano, kuphinde kufake engozini indlela yokuziphilisa komdlali, ikusasa lenhlalakahle yakhe.
Inhlanganiso le iveze ukuthi izathatha amanyathelo aqinileyo, kumaqembu wonke azotholakala esephula umthetho lo.
Ithe iqembu elizakwenza lokhu lizabhadala imali yonke engalahlekela umdlali ngenxa yaleso sinqumo.
