admin
Msilisi Dube
INHLANGANISO ekhangele ngokugcinwa kuhle kwezihlahla eyeForestry Commission ikhuthaze amabandla atshiyeneyo ukuba ahlanyele izihlahla ukwenzela ukuba umhlabathi ungagugudeki ngenxa yamanzi.
Kubikwa esikhathini esinengi umhlabathi uyagugudeka ngenxa yokuthi kungelazihlahla ezibamba lowomhlabathi ekukhukhulweni ngamanzi.
Ekhuluma embuthanweni obuqhutshelwe edolobheni leMasvingo emavikini adluleyo uNkosikazi Violet Mutoko oyisisebenzi senhlanganiso le, uthe kubalulekile ukuba amabandla akhuthalele ukuhlanyela izihlahla ukwenzela ukuba bathole umoya ohlambulukileyo.
“Kulezinsuku amankampani amanengi ayapheka imithi eminengi eyingozi emkhathini. Nxa bepheka lokho abakuphekayo kuphuma intuthu enengi kakhulu ebulala umkhathi kungakho ukuze umkhathi ungonakali abantu balomlandu wokuhlanyela izihlahla.
“Izihlahla ziqakatheke kakhulu ngoba zisinika umoya ohlanzekileyo ngakho kubalulekile ukuba zihlanyelwe zibe zinengi ukuze uzulu aphefumule umoya ohlanzekileyo,” kuchaza uNkkz Mutoko.
Kubikwa esikhathini esinengi amabandla awavamanga ukuhlanyela izihlahla ngoba bengelalwazi ngokuqakatheka kwazo.
“Sithanda ukukhuthaza amabandla wonke ukuba akhuthalele ukuhlanyela izihlahla ukuze bazuze ukudla kizo.
Izihlahla zisinika ukudla njalo ziyasinceda ngenkuni. Nxa imvelo singayiphatha kuhle layo izasiphatha kuhle ngoba isiphilisa,” kuphetha uNkkz Mutoko.
Omunye umlimi osonta ebandleni leZCC uNkosazana Primrose Zhou uthe bekunzima ukuba bahlanyele izihlahla ngoba bengaluboni uncedo lwazo.
“Thina besingelandaba lokuhlanyela izihlahla ngoba sicabanga ukuba izihlahla zizimilela nje. Njengoba sesifundisiwe kabanzi ngokuhlanyela izihlahla lezi sizazama ngazo zonke indlela ukuzihlanyela ukuze silondoloze imvelo yethu kuhle,” kutsho uNkszn Zhou.
Online Reporter