marble nkomo
Nkosilathi Sibanda
KUDABA olusemlonyeni yezakhamizi zeVumbachikwe, eGwanda, kulenina elingumasitanda, elileminyaka yokuzalwa engu-43 ebelisenza ukuganga okwenyanyekayo, nanko kuvele ukuba belihlangana emacansini lomntwana weloja ongumfana oleminyaka emine yokuzalwa.
Owesifazana lo, ohlala eVumbachikwe Mine ugwetshwe iminyaka engu-17 esejele ngemva kokutholakala elecala lokuhlukumeza umntwana ngokocansi.
Isigwebo lesi sethulwe emthethwandaba kamantshi eGwanda ngemva kokuba inkundla izwe ukuthi owesifazana lo wabamba ngamandla ukuya emacansini lomfana ngoLwezi 2025.
Kuzwakale ukuthi udaba lolu lwavela ngemva kokuba umntwana ezame ukuphindisela akwenziwe linina leli kumfowabo, oleminyaka eyisikhombisa yokuzalwa.
Umama wabantwana wathi ekubona lokhu, wancedisana lomakhelwane ukumbuzisisa, wasechaza ukuthi umninindlu wayeseke wamhlukumeza kanengi ngaphambilini.
Udaba lwabikwa emapholiseni masinyane, kwaba yikubotshwa kwenina leli. Umntwana wahlolwa ngabodokotela, iphumela yalethwa emthethwandaba yaba yibufakazi ecaleni.
INational Prosecuting Authority of Zimbabwe ibike ukuba ukuhlukumeza okunje kukhangelwa njengecala elikhulu ngaphansi komthetho wakuleli njalo labo abatholakala belecala baphiwa izigwebo eziqatha.
“INational Prosecuting Authority izimisele ukuvikela abantwana lokuthi abenza amacala ocansi bazajeziswe ngokupheleleyo ngumthetho.
“Abazali lalabo abagcine abantwana bakhuthazwa ukuba bahlale beqaphele njalo babike masinyane nxa besola ukuthi abantwana bayahlukunyezwa.”
Online Reporter
Peter Tanyanyiwa