Online Reporter
Nkosilathi Sibanda
IDOLOBHO lakoBulawayo libaluleke kakhulu kundawo ezikuzigaba zonke zomhlubulo weMatabeleland.
Ngaphandle kokuba yinkaba yamabhizimusi lamawofisi enhlelo eziphathelane lozulu loHulumende, idolobho leli lekhansili yalo liyinsika yokukhula kwendawo eziseMatabeleland North laseMatabeland South.
Lokhu kubonakala ngobudlelwano obukhona phakathi kwekhansili yakoBulawayo lamakhansili emaphandleni eMatobo, Tsholotsho, Hwange, Kusile, leNsiza.
Ikhansili yakoBulawayo kuliviki iphakathi kokufundisa izisebenzi ezicitsha umlilo ezivela kumakhansili endawo lezi, ngaphansi kohlangothi lwayo lweFire and Ambulance Service Unit.
“Ama-Rural District Councils ((RDCs) abalisela iTsholotsho, Kusile, Matobo, Insiza leHwange alethe izisebenzi kuzifundo lezi.
“Kulezisebenzi ezicitsha umlilo ezingamatshumi amathathu eziqale izifundo ngoMvulo. Ikhansili inye ngayinye ithumele izisebenzi eziyisithupha. Kuqula leli, kulabesifazane abayisithupha,” kubika ikhansili yakoBulawayo.
Ikhansili yakoBulawayo ibike ukuba kusenhlelweni zayo ukufundisa lokwabela ulwazi amakhansili asemaphandleni.
Uhlelo lokufundisa izisebenzi zemakhansili asemaphandleni akumhlubulo ongezansi yelizwe, okwenziwa yikhansili yakoBulawayo, sekunconywe zingatsha zikaHulumende, nanko kuyaphathisa ekuvikeleni ingozi lokuphakamisa izakhamizi kundawo eziseduzane ledolobho.
