Online Reporter
Ethel Ncube
NGESONTO omama baqonda e-Acaja duzane leNtabazinduna besiyathakazelela usuku lwabomama, iMother’s Day.
Indawo yokuzithokozisa le ikhangelele ukubamba uhlelo lokunanza omama bonke ngaphansi kwendikimba ethi, “Empowered Moms, Thriving Families.”
Ekhuluma lentatheli uMnumzana Abednico Dube ongumnikazi we-Acaja ubike ukuba bazathakazelela usuku lwabomama ngendlela eyehlukeneyo.
“NgeSonto sizabe sihlonipha omama e-Acaja, sibancoma ngemisebenzi yabo emihle abayenzayo. Silohlelo oluthiwa yi- ‘Empowered Moms, Thriving Families lapho omama abazahlangana khona bazane ngcono, badlale imidlalo etshiyeneyo njalo babelane ulwazi ngokutshiyeneyo.
“Lapha kuzabe kulemidlalo etshiyeneyo efana lethi, Mom’s Got Talent, Mom’s Trivinia, Mom’s Scavenger Hunt leminye etshiyeneyo,” kubika uMnu Dube.
Uqhubekele phambili eveza ukuba omama bazathola ulwazi olutshiyeneyo ngalelolanga.
“Kuzaxoxiswana ngempilo yabomama lokwazi ukuhlanganisa umsebenzi kunye lokunakekelwa kwemuli. Kuzafundiswa ngempilakahle yengqondo ngoba siyazwisisa ukuthi ukuba ngumama ngumsebenzi omkhulu.”
Uphethe ngokukhuthaza omama ukuthi babuye ngobunengi kule indawo bazotshaywa ngumoya ngapha befunda.
