Peter Matika
IKHANSILI yakoBulawayo isuqalise ukuguqula amabhawa ayo angasasetshenziswa ukuthi abe yizikolo zokufundisa intsha imisebenzi yezandla, ngenhloso yokubancedisa ngendlela zokuziphilisa kanye lamathuba okukuvula amabhizimusi.
Indawo yokuthengisa utshwala iKhwezi Beer Garden ePelandaba isiguqulwe yaba yisikolo semisebenzi yezandla, lapho abafundi asebeqalise ukufundela ukupheka lokuphatha umsebenzi wokudla emahoteleni.
Ikhansili ithe amalungiselelo okuvula indawo zokufundela asezingeni eliphezulu.
IMagwegwe Beer Garden layo isidluliselwe kugatsha lwekhansili olubona ngezokwakhiwa kwezindlu, lempilakahle kazulu ukuze iguqulwe ibe yindawo yokuthuthukisa amathalenta lokusungula amabhizimusi amatsha.
Ngokutsho kwekhansili, ukufundiswa kwezokudla lokupheka eKhwezi sekuqalile, njalo kulamalungiselelo okuqedisa ukwakhiwa kwendawo zokufundela ukufakwa kwamandla elanga lentambo zamagetsi, bencediswa yinhlanganiso yeSNV Zimbabwe.
“Abafundi asebefundela ukupheka lokusebenza emahoteleni sebeqaliile izifundo zabo kulindawo.
Amalungiselelo okuqedisa indawo zokufundela ukufakwa kwamandla elanga lentambo zamagetsi ezindlini ayaqhubeka, sincediswa yiSNV Zimbabwe,” kutsho ikhansili.
Idolobholo lakoBulawayo lilendawo ezingu-21 zokufundisa imisebenzi yezandla lokusungula amabhizimusi, lapho abatsha abafundiswa khona imisebenzi engabancedisa kwelakusasa.
Izifundo ezikhona zigoqela ukwakha, ukubaza, ukufaka impompi zamanzi, ukunusela, ukulungisa izimota, ezokulima, ukufakwa kwamandla elanga, ukufakwa kwentambo zamagetsi ezindlini, ukulungisa omakhalekhukhwini, izingxingi mazwi zakulezinsuku, ukupheka lokusebenza emahoteleni, ukuthunga izigqoko, lokulungisa inwele.
Ikhansili iphinde yasebenzisana leWorld Vision ukusungula iYouth Light Industry Centre e-Old Pumula.
