Online Reporter
Bhekimpilo Tshalibe
IKHANSILI yakoBulawayo isixwayise izakhamizi zakoBulawayo ngenani lezinja okumele bazifuye emzini yazo.
Kusitatimende esikhitshwe nguNobhala jikelele wedolobho lakoBulawayo, uMnumzana Christopher Dube uthe izakhamizi azivunyelwa ukufuya izinja ezedlula ezimbili emagumeni azo.
“Njengekhansili sithanda ukwazisa abantu ukuthi endaweni yekhansili engaphansi kwe-2000m2 akumelanga umuntu afuye izinja ezedlula ezimbili kumbe ezedlula ezine endaweni ephezulu kwe-2000m2.
“Akulamuntu ozavumela inja yakhe ukuthi iphume phandle kweguma lakhe ingabotshwanga,” kutsho uMnu Dube kusitatimende lesi.
Kubikwa izinja kumele zigcinwe endaweni ebiywe ngocingo kumbe elomduli njalo kube lentuba yomuzi.
“Izinja kumele zigcinwe endaweni ebiywe ngocingo kumbe elomduli njalo ibe lentuba. Akuvunyelwa ukugcina izinja nxa kulothango lwengotsha kumbe izihlahla.”
Ubuye waveza ukuthi zonke izinja kumele zivikelwe kumkhuhlane wobhova.
“Izinja kumele ziyehlatshiswa ukuze zivikelwe emkhuhlaneni wobhova futhi zibe lechence,” kutsho uMnu Dube.
Uthe kusukela ngoMvulo kuviki ezayo izisebenzi zekhansili, amapholisa akuleli, abeVeterinary Field Services kanye labe-Society for the Prevention of Cruelty to Animals (SPCA) bazabe bebhoda beqinisa umthetho wokubophela izinja.
“Kusukela mhlaka 5 Nkwenkwezi kusiya ku 5 Nhlangula zonke izinja ezingela banikazi zizadutshulwa, labagcine izinja indawo zabo zingavalekanga kumele bebone ukuthi bayakulungisa lokhu.
“Kuthi labo abagcine izinja ezidlula inani elivunyelwa endaweni abahlala kuyo kumele bazise e-SPCA, kuMagazine Road eThorngrove kungakafiki umhlaka 5 Nkwenkwezi,” kutsho uMnu Dube.
Uphethe ngokuthi labo abangenelisi ukunakekela izinja zabo bakhuthazwa ukuthi labo bazise eSPCA.
