Online Reporter
Ethel Ncube
IKHANSILI yedolobho lakoBulawayo isikhiphe umbiko wokuba isizathwala izibi ebusuku enzikini yedolobho leli.
Kusitatimende esifakwe kunkundla yokuxhumana ye-X eyayisaziwa ngokuthi yiTwitter, ikhansili yakoBulawayo ibike ukuba izaqala ukuthwala izibi ebusuku mhlaka 13 Mbimbitho kuze kwethulwe esinye isaziso.
Izibi zizathwalwa phakathi edolobheni kusukela ngehola lika 8 ebusuku kusiya ku 6 ekuseni.
“Sithanda ukwazisa uzulu olesakhiwo esidikidikini sakoBulawayo kumbe labo abalezindlu ukuba izibi zizabe zithwalwa ntambama kusukela mhlaka 13 Mbimbitho kuze kwethulwe esinye isaziso.
“Sicela ukuba izibi zifakwe lapho izisebenzi ezizenelisa ukuzithwala khona. Ozehluleka lokho uzabe ezazithwalela izibi zakhe ayezilahla lapho ezilahlwa khona ngeyakhe imali.
“Izibi zonke kumele zifakwe phakathi kwamapulastiki, kungenzeka ukuba zingathwala abamabhizimusi baziswa ukuthi zizathwala ngosuku olubekiweyo olulandelayo ngokunjalo kumele bazifake kuhle endaweni zabo hatshi ukuziphosa,” kutsho isitatimende lesi.
KuMasotsha Ndlovu lo Leopard Takawira kusedlula kuphakathi kukaJ Moyo loBasch obizwa ngokuthi nguD1E, izibi zizathwala ngeSonto, ngoMvulo, ngoLwesithathu langoLwesine. Kuthi kuS19E ohamba ku Masotsha Ndlovu Avenue kusiya kuL Takawira phakathi kukaJ Moyo Street lo S Parirenyatwa Street izibi zizathwala ngeSonto, ngoLwesibili, ngoLwesithathu, ngoLwesine langoMgqibelo.
Kuthi kuS20E okungumgwaqo kaL. Takawira kusiya ku15th Avenue, ihambe phakathi kukaBasch Street loJ. Moyo izathwala izibi ngeSonto, ngoLwesibili, ngoLwesithathu, ngoLwesihlanu langoMgqibelo kuhlangothi lokucina olubizwa ngokuthi nguD2E izabe ithwala kuL. Takawira kusiya ku15th Avenue, laphakathi kukaJ. Moyo kusiya kuS. Parirenyatwa,” kutsho isitatimende lesi.
Kukhuthazwa ukuthi izibi zonke zibekwe egcekeni ukuze abathwala izibi bangathwali nzima.
