Online Reporter
Sikhumbuzo Moyo, eseBinga
IZIKOLO zesabelweni seMatabeleland North zibika ukuba zizakhetha abantwana abenze kuhle abalethalenta eliphezulu kwezokugijima ukuze benelise ukuthola imendulo kumncintiswano wezabelo lonyaka.
Lokhu kukhulunywe ngumphathi womdlalo wokugijima kulesi isabelo kunhlanganiso yeNational Association of Secondary School Heads (Nash), u-Abraham Netha.
Amaqembu abantwana besikolo abamela izigaba eziyisikhombisa kulesi sabelo baphakathi kokuncintisana enkundleni zesikolo seManjolo High, eBinga. Imincintiswano iqale ngoLwesithathu njalo iphela ngoLwesihlanu.
Isigaba zeMat North zibalisela iHwange, Binga, Lupane, Tsholotsho, Umguza, Bubi leNkayi.
Kumncintiswano oseBinga kuzakhethwa iqembu elizamela isabelo eChipadze High eBindura, esabelweni seMashonaland Central ngoMabasa.
“Inye indlela yokuthi sithole ukunqoba. Kumele njenge sabelo sikhethe ithalenta eliyilo, intshantshu. Inhloso yethu iqembu elizakuya kuma-nationals, kubeliqembu eliqinileyo elibunjwe kubagijimi abathole imendulo kuphela. Nxa sibona ukuthi umntwana kenzanga kuhle, siyamtshiya,” kutsho uNetha, onguMphathisikolo weGeorge Silundika.
Isigaba seBubi sabayintshantshu nyakenye ngemva kokuthola imendulo zegolide ezingamatshumi amabili lane, ezesiliva ezingamatshumi amabili lanye lezethusi elitshumi lane.
Kusenjalo, kuthe kusiyafika isikhathi sokudla kwemini ngoLwesine, bekukhokhela isigaba seBubi silandelwa yiMguza. Izigaba zombili beziphethe imendulo zegolide eziyisikhombisa lezesiliva ezinhlanu ngokulingana. Kodwa, iBubi ihambe phambili ngalesi sikhathi ngoba ithole imendulo zethusi ezinhlanu, iMguza ingela.
Kulandela iLupane ngemendulo eziyisithupha, isiliva ezine lamathusi amahlanu. Esinye isigaba esilethalenta ngeseHwange esingene isikhathi sekhefu lokudla silamagolide lamasiliva amane ngokulandelana kunye lezethusi eziyisithupha.
