Online Reporter
Nkosilathi Sibanda
IKHANSILI yakoBulawayo isithumele amazwi enduduzo emulini yako-Esat kulandela ukudlula emhlabenin kowayengukhansila njalo engusomabhizinisi odumileyo, uMnumzana Mohammed Esat.
UMnu Esat udlule emhlabeni ngeSonto eleminyaka engu-80 yokuzalwa.
Kumbiko owethulwe nguSodolobho wakoBulawayo, uKhansila uDavid Coltart, emele amakhansila wonke, uNobhala wedolobho uMnumzana Christopher Dube, iziphathamandla zekhansili lezisebenzi, uthe bafisa ukwethula amazwi enduduzo kumdeni wako-Esat kulandela ukudlula emhlabeni kukasomabhizimusi lo.
“UMnu Esat ukhunjulwa njengomunye wabosomabhizinisi abaphakamise ibizo lakoBulawayo njalo owaba ngukhansila ku-Wadi 1 kusukela ngomnyaka ka-1995 kusiya ku-2003.
“Ngalesosikhathi waba lilunga lamakomithi abalisa elezemali lentuthuko, ele-Audit, ele-Environmental Management and Engineering Services leFuture Water Supplies and Water Action,” kutsho uSodolobho.
“Ngaphandle komsebenzi wakhe kukhansili, uMnu Esat watshiya ilifa elikhulu kwezamabhizimusi lakwezokunceda umphakathi. Wabuya wanikwa isithupha sokubongwa ngemva kokuthola kwelizwe uzibuse ngo-1980 ngenxa yosekelo lwakhe ekulweleni inkululeko yeZimbabwe.
“Kusukela ngomnyaka ka-1996 kusiya ku-1999, waba lilunga lebhodi yeLocal Authorities Pension Fund Board of Trustees. Uphinde wasebenza kwezinye inhlanganiso ezibalisa iBulawayo Publicity Association lezinye ezazikhuthaza ukuthuthukiswa kwamabhizimusi kulelidolobho.”
USodolobho uthe uMnu Esat uzahlala ekhunjulwa ngokudala amathuba emisebenzi, ukukhuthaza intuthuko engabandlululiyo lokwakha ibhizimusi le-Esats Shops, elaliseduze lenhliziyo zabantu bakoBulawayo.
“Idolobho lilahlekelwe ngumuntu obezinikele ekusebenzeleni uzulu lasekuthuthukiseni uBulawayo. Ilifa alitshiyileyo lizahlala likhanya kuzizukulwane ezizayo,” kutsho uSodolobho.
UMnu Esat ubekwe ngoMvulo emathuneni e-Athlone Cemetery.
