admin
Cornelius Luphahla
MHLAKA 25 kuyonale inyanga kuzabe kuyisiphithiphithi phakathi kwesitalada uJason Moyo lo 8 Avenue koBulawayo lapho iqembu lesicathamiya iMpumelelo Shining Stars elizabe likhipha khona idlalade lalo lesificaminwe mibili.
Umkhosi lo uzadibanisa njalo amaqembu ambalwa esichathamiya agoqela iMpumelelo Shining Stars, iBlack Mfolosi, iSunduza, iAmazulu, Ukukhanya Kwezwe, iBulawayo Choristers, Great Stars, kanye lamanye njalo amaqembu embube.
UTiambiwi Shoko olilunga leqembu leMpumelelo Shining Stars uveze ukuthi kumkhosi lo bajonge ukuvuselela umculo wembube.
“Sesinanzelele ukuthi umculo wembube sufiphele ngakho sibone kungcono ukuthi senze umkhosi lo phakathi kwedolobho ukuze abantu bazibonele ukuthi usekhona njalo suvuke khwatshu.
“Okunye njalo sikhangelele ukuthi umculo lo siwufafaze indawo yonke ukuze ungatshabalali,” kutsho uShoko.
Ekhuluma lentatheli umholi waleliqembu uOscar Siziba uchaze ukuthi idlalade labo likhuluma ngokuvuleka kwamazulu ngoba bazibona bethuthuka kwezomculo.
“Idlalade lethu lithi “Avulekile Amazulu” ngenxa yokuthi sinanzelele ukuba sithuthuka ngamandla kwezomculo akukho esikusolayo yikho sihlabele ingoma ekhuluma ngokuvuleka kwamazulu.
“Lapha siveza intokozo esilayo ngokuthuthuka kwethu kwezomculo ukuthi kudalwa nguNkulunkulu ngokusivulela amazulu kwehle izibusiso emculweni wethu,” kutsho uSiziba.
USiziba uqhubekele phambili wathi idlalade labo baliphekele kweleSouth Africa njalo lizaba ngelokuqala ukuba abantu bangene mahala mhla likhitshwa.
“Idlalade lethu leli siliphekele kweleSouth Africa ngenhloso yokuthi sijabulise uzulu ngazo zonke indlela. Idlalade leli ngelesificaminwe mibili njalo ngelokuqala ukuba silenzele umkhosi wokulikhipha ongenwa mahala.
“Okwenza sivumele abantu bangene mahala emkhosini lo yikuthi sikubone kukuhle ukuba uzulu ajabule lathi mahala njengoba ehlala esipha imali. Sithe lathi sike sibonge izipho esihlala siziphiwa ngabantu bengena emikhosini yethu. Okuzabe kuthengiswa yilo idlalade lethu leli kuphela,” kuphetha uSiziba.
Online Reporter