admin
Leonard Ncube
INDUNA uSinamagonde weBinga etshone ngeviki ephelileyo ileminyaka yokuzalwa engu-78 ibekwe khonale eBinga ngoLwesithathu.
Isikhulumi semuli uMnumzana Robert Muzamba uthe induna uSinamagonde ibizo layo lokuzalwa elingu-Sinyenyi Muchwayile, ibhubhe ngeviki ephelileyo esibhedlela seSt Luke’s eLupane ngemva kokuhlala esibhedlela okweviki eyodwa.
UMnu Muzamba uthe induna ibhubhe ngemva kokutshaywa yi-stroke izihlalele esitulweni sayo ekhaya.
“Ukufa kwenduna kusimangazile. Ibeselesikhathi ekhala ngobuhlungu benyawo kanye lesifuba kodwa ngeke sithi ibigula kakhulu. NgeSonto wayezihlalelele esitulweni phandle kwendlu yakhe yokulala wasekhanya engomileyo umhlubulo owodwa njengomuntu otshaywe yi-stroke.
“Ngabizwa ngathi ngifika khona ngazama ukumkhulumisa kodwa wayengasenelisi ukuphendula,” kutsho uMnu Muzamba.
Induna uSinamagonde yabekwa ukuba yinduna ngomnyaka ka 1983.
Indodana yakhe uMnumzana Bigboy Mumpande ithe imuli ilahlekelwe ngumthunzi obuvikela wonke umuntu.
Ngokutsho kukaMumpande umuyi wayekhala ngobuhlungu benyawo okubikwa kwaqala ngesikhathi aze abotshwe ilizwe lingakathathi uzibuse. Uthe induna kukhanya yahlala ejele okweminyaka emihlanu eKhami, eChikurubhi kanye laseWhawha ngesikhathi kullwiwa impi kazibuse.
Induna ibekwe emzini wayo ngoLwesithathu njalo itshiye amakhosikazi amane, abantwana abangu-16 kanye labazakulu abangu-71.
Online Reporter