admin
Mehleli Dube
Ukunotha komuntu kuvela ekusebenzeni kwakhe nzima, ajuluke akhwenyeze amabhulugwe, ahlele njalo lezinto afuna ukuzifeza nxa kuphela umnyaka.
Inotho kayisiyonto ebuya lula, yimbadalo yokusebenza gadalala ebusuku lemini uzama ukuba ibhizimusi ihambe.
Phela okusetshenzwe ngendlela eqondileyo lenotho yakhona yenza umnikazi alale obuka Bhuka, bakhona abanye abantu abanothileyo okwamagama kodwa ngeke bakudwebela ngitsho legrafu ukuthi baqala kanjani, sebenothe okumangalisayo.
Umuntu wakhona inotho yakhe ngeyesiphangiphangi okwenza abantu bahle baqale ukuvula amehlo ngoba belensolo ngayo. Ngeke ubalise ukuthi kwaqala lapha kwaya laphaya umane nje ubone sokuyinotho emangalisayo.
Siyake sizwe emsakazweni sibale lakumaphephandaba abanye sebekhalala okuyimigobho kwabo ngoba kwesinye isikhathi kuyabe kufuna igazi lesihlobo ekupheleni komnyaka. Bafe buthumuthumu abomdeni, ngapha umuntu izinga lokunotha uthole liqonga.
Phela kuyangungunwa ukuba inengi labantu abalenotho evuka ikhona balezinto ezehlukeneyo ezigoqela inyoka, ondofa lokunye okwehlukeneyo okuyikho okulethela lowomuntu inotho ayabe esezitshaya isifuba ngayo.
Ngikhumbula enye indoda engake ngafunda ngayo kwelinye iphephandaba, yayilenyoka leyo nyoka yiyo eyayingumkhwenyana wakhe, yayisenza abantwabayo bonke abangamantombazana amakhosikazi.
Amantombazana azalwa nguye lapha ekhaya, bonke bobahlanu babengendanga, bakudingisisa abantwana kubo siyazi lakubaphurofethi kwayabanjwa uyise lenyoka yakhe.
Laye wavuma phambi komdeni, ethi nxa leyo nyoka ilala labo kulendlu evuka igcwele imali phakathi ize iyotshaya ephahleni. Indlu le yayingangenwa muntu ngaphandle kwakhe.
Abanye njalo ngabadinga abantu eGoli, abulale abantu ebakhuthuza izimali, kodwa ekucineni siya sibabone sebephambene umuntu aphenduke isinukunuku okwebululu eliginye umhlwazi.
Kusasa kuphinde kuhluphe nxa umnikazi esefile ngoba kanengi amalunga omdeni ayabe engakwazi ukuthi kwenziwani bekele kuxhwale kuthwalise umdeni luklubhu.
Asifundeni ukusebenza ngamandla kujuluke umsisila endodeni, uzidlele amandla akho hatshi ukulala ungalele mhlawumbe sokubuya kuzokuhinahina usukucunule.
Ayixabene.
0714355641
Online Reporter