Siphakeme .Mnindwa
Izifuyo
Kuthiwa esiNtwini nxa kukhulunywa ngezifuyo kwakutshiwo inkomo lembuzi. Izimvu zazingandanga. Izifuyo lezi-ke zazithathwa njengesikhonkwane somuzi. Umuzi ongelazo izifuyo wawungeke waba ngumuzi opheleleyo, uzifananela-nje lomuzi ongabethelwanga.
Ukuqakatheka kwezifuyo kwakubonakala ngemisebenzi yonke eyayisetshenzwa ngezifuyo. Ngenxa yalokho, kuthiwa indoda yayithatha inyathelo eliqinileyo lokubona ukuthi izifuyo zayo zivikelekile njalo zanda ngemfanelo. EsiNtwini kuthiwa izifuyo zazidingelwa umthuso. Umthuso lo kwakuthiwa ngowokwenza ukuthi inkomo zingaphunzi. Phezulu kwalokho kuthiwa zazidingelwa ibaso.
Kwakudingwa izihlahla ezithile zigejelwe esangweni lesibaya, ezinye phakathi kwaso ezinye zitshiswe khonapho esibayeni. Ibaso leli kuthiwa lalisenzelwa ukuthi izifuyo lezi zingaphombukudliwa nje yizilo nxa zilahlekile zalala emangweni. Kwenza njalo ukuthi zingaphongungenwa yimikhuhlane.
Ukutholakala kwezifuyo: Izifuyo ezisekhaya ngezikababa owayezithola ngendlela ezitshiyeneyo. Nanzi ezinye indlela ayethola ngazo izifuyo amadoda: Ezelifa: Lezi zinkomo umuntu ayeziphiwa ngemuva kokufa kukayise. Ukwelapha: Nxa engumuntu owazi izihlahla wayengaphiwa imbadalo esikhathini ibe yinkomo.
Izifuyo
Ukubaza: Zikhona ezinye impahla ezibazwayo abanye ababesiba zingcitshi kuzo, ngakho labo abangakwaziyo ukuzenzela babezithenga kwabakwaziyo. Yayingaphuma imbuzi kumbe inkomo, iphumela impahla ezinjengalezi: ingiga, isiganu, imiganu njalonjalo.
Ukuthunga amaxaba: Kayisibo bonke ababekwazi ukuthunga amaxaba ngakho labo abazingcitshi zalokhu babelakho ukuthunga bethengisa kumbe abanye benze lezigogo zabo ukuthi bathungelwe amaxaba.
Ingiga
Ukutshuka imichilo: Lokhu lakho kwakudinga ulwazi olujulileyo. Labo-ke ababekwazi babethola imbadalo ngaleyo misebenzi. Inkomo zamalobolo: Nxa abantwabakhe besenda wayelobolisa; inkomo lezo ngezakhe. Kwesinye isikhathi kungabe uyise uthe esifa odadewabo bengakendi wayesala eselobolisa yena, inkomo lezo zibe ngezakhe.
Inkomo zikamama: Loba izifuyo zingezikababa kwakungatsho ukuthi umama yena wayengalazo ezakhe. Ezikamama zona zazisiba kabili; (1) Inkomo zakhe ngebizo (2) ezakhe mathupha, inkomo angenza lokho akhetha ukukwenza ngazo. Inkomo zakhe ngebizo: EsiNtwini, umfazi angenda, abakwabozala babefika bamuphe inkomo okwakuthiwa ngezesengelo lakhe.
izifuyo
Inkomo zesengelo ngezokuthi asenge, uchago lwazo luthelwe embizeni yakhe. Yilo phela ayesondla ngalo abantwana.
Inkomo zesengelo zazingezendoda, yena okwakhe luchago lwazo kuphela. Kodwa loba kwakunjalo, zazibizwa ngaye. Inkomo zakhe mathupha: Lezo nkomo ezazibiza yena ayezithola ngendlela ezitshiyeneyo.
Kodwa kuyatshiwo lapha ukuthi loba zazingezakhe nje nxa kwakukhona ayefuna ukukwenza ngazo kwakumele acele kumkakhe.
Online Reporter