Online Reporter
Nkosilathi Sibanda
SEKUSELE amalanga ambalwa ukuthi kuqale umcimbi omkhulu wemiklomelo kaDakamela ozaqhutshwa kusukela mhlaka 3 kusiya ku-6 kuMabasa, lapho umphakathi weNkayi okhangelele ukuthi kube lenguquko enkulu kwezamasiko, kwezokuvakatsha lomnotho wakulindawo.
Umkhosi lo obizwa ngebizo lenduna uDakamela, usukhule waba yinkundla ehlanganisa izakhamizi zeNkayi labantu abaphuma kundawo ezitshiyeneyo kuleli laphetsheya.
Lonyaka, ngokubika kwabaqoqi bombuthano, kuzakuba labantu abanengi, nanko kukhangelelwe ukuza kwenkokheli zomdabu ezivela eSouth Africa, Botswana, Zambia, Kenya lakwezinye indawo. Ngenxa yokuthi umkhosi lo usumemetheke kakhulu, kubikwa kuzavakatsha labantu abavela e-United Kingdom lase-Australia, ikakhulu labo abafuna ukuthola ulwazi lwezamasiko amaNdebele lemvelaphi yawo.
Ngokunjalo, uMnumzana Arthur Mlozwi ongumongameli weNkayi Business Community, uthe umkhosi lo uletha amathuba amakhulu okwandisa imali engenayo.
“Sikhangelele ukuba lebhizimusi elihle ngesikhathi somkhosi wenduna uDakamela. Lesi yisikhathi esivulela amathuba amakhulu okukhula kwamabhizimusi ethu.
“Eqinisweni, umkhosi lo uphakamise iNkayi yonke. Lo ngumthambo wokuvuselela amasiko nanko phela kulabantu abavela emazweni abalande ukuzofunda, ukubuka lokwamukela okwenzakala kuleli,” nguMnu Mlozwi lo.
UNkosikazi Nomsa Dube, omunye ongaphansi kwenhlanganiso yabosomabhizimusi, ogxile kwezokudla, uthe: “Leli lithuba lethu lokuthola imali. Sizapheka ukudla kwesiNtu nanko phela sitshaye inala lonyaka. Kumele inala le isiphe imali ngokuthengisa ukudla emicimbini enjengale. Sinxusa abantu ukuthi bezokudla okwesiNtu lapha eNkayi.
Sikhangelele ukuthi abantu abanengi bezothenga. Ngaleyondlela ibhizimusi liyakhula.”
UMnumzana Blessing Ndlovu, othengisa impahla eyenziwe ngezandla uthe: “Ngilungise impahla zomdabu ezikhangelwa njengezikhumbuzo kubavakatshi ngoba bathanda ukuthenga izinto ezibakhumbuza indawo abayivakatsheleyo.”
Iphephandaba likazulu lixhumane lezinye izakhamizi zeNkayi ezithe imiklomelo kaDakamela isiyinsika ekuvuseleleni amasiko. UNkosikazi Thandeka Ncube uveze ukuthi usebe kulumkhosi kusukela usungulwa ngakho.
“Imiklomelo kaDakamela isinceda kakhulu ekugcineni isiko lethu liphila. Abantwana bayafunda ngemigido, izembatho lemikhuba yamaNdebele.”
derick.khumalo