admin
Johas Moyo
KUDABA okunathiswana ngalo itiye esigabeni seBubi kulendoda yakule indawo evuke ubhova yahlahlela umakhelwane wayo ngebhemba kubangwa insimu, uMthunywa ukuzwile lokhu.
Isiga lesi senzakale kuviki ephelileyo lapho umetheswacala uBhekani Ndlovu ahlasele khona umakhelwane wakhe uThamsanqa Bhebhe ngebhemba ehlombe kubangwa insimu ebisilesikhathi eside ingalinywa.
Intatheli izwe ukuthi ababili laba behlulekile ukuthi babone ngaso linye okucine kubangela ukuthi uNdlovu ekhulelwe lulaka wasehlahlela umamangala.
Ekhuluma loMthunywa uNkosazana Lizzy Khumalo uveze ukuthi lanxa ababili laba babexabana kodwa kakuzwisisi ukuthi kuyini okungabe kwabangela uNdlovu ukuthi ahlahlele uBhebhe ngebhemba.
“Silokhe sitshe amathe ngesenzo sikaNdlovu ngoba wamlimaza sibili umakhelwane wakhe kubangwa nje insimu.
Mhlawumbe kukhona okukhulu abakufihlayo amtshayela khona,” kutsho uNkszn Khumalo.
Ebuzwa ngalindaba umetheswacala ubike ukuthi baxabana sibili kodwa sebekhumisane umlotha njalo uNdlovu uthembise ukuhlawula ngoba waphambanisa.
“Kuliqiniso ukuthi sixabene lomakhelwane wami ngendaba yensimu kodwa sesikulungisile savumelana ukuthi ngizabhadala ngembuzi ezimbili ngoba kwenzakala ngephutha,” kutsho uNdlovu.
UMthunywa uxhumane loMnu Bhebhe oveze ukuthi ulokhe elesithuli ngokwenzakalayo laloba sebakhulumisana kodwa kuye kukhona nje okungahlanganiyo ngokuhlahlelwa kwakhe ehlombe ngumakhelwane.
“Kuyadanisa okwenzakalayo ngoba sakhe ndawonye njalo kasikaze sixabane kodwa umngcele wensimu wenze ngacina ngilinyazwe ngumakhelwane wami.
“Angazi ukuthi ngaphambanisani ngoba wangibiza ngicabanga ukuthi sizakhulumisana kanti sengisiya ganyulwa.
Kodwa-ke sesikhulumisene njengabomakhelwane,” kutsho uMnu Bhebhe.
Isikhulumi samapholisa esabelweni seMatabeleland North uAssistant Inspector Namatirai Mashona ubike ukuthi ubengakawuzwa umbiko lo kodwa uthe amapholisa azadingisisa kabanzi ngawo.
Online Reporter