admin
INDUNA uWasi Ndiweni yesigabeni seMangwe esabelweni seMatabeleland South isicele uHulumende ukuthi akhulumisane leziphathamandla zeBotswana ngokudutshulwa kwenkomo zakuleli ezingena kulelo lizwe.
Ilizwe leBotswana ngomnyaka ka2016 labeka umthetho wokudubulela ukubulala ukuze kwenqatshelwe ukungena kwenkomo zakuleli kulelo osokubangele ukuthi kubulawe inkomo ezedlula i-1000 zeBulilima leMangwe kuminyaka emine edluleyo.
Induna uNdiweni iqhubekele phambili iveza ukuthi inkomo zabantu abangaphansi kwayo zilokhu zidutshulwa ngabakweleBotswana lanxa amazwe la womabili ake axoxisana ngodaba lolu, okwenza kubaluleke ukuthi uHulumende aphinde njalo ahlale phansi akhulumisane labakweleBotswana ngoba lokhu sokubangele ukuthi imuli ezinengi zibe mpofu ngoba zihlala duzane lomgcele lo njalo akulacingo okwenza kubenzima ukulawula inkomo ukuthi zingayi kolunye uhlangothi.
Uphinde njalo waveza ukuthi sebebe lemihlangano embalwa labakhokheli benhlangothi zombili kodwa akukho okubambekayo okwenzakalayo.
Umeli wephalamende weBulilima West Dingimuzi Phuti uvumile ukuthi ukukhulumisana kubalulekile njalo uthe baqhubekela phambili bezama ukukhulumisana lamapholisa, izakhamizi kanye labakhokheli bomdabu ngoba akulanzuzo enkulu.
Online Reporter