Online Reporter
YiNtatheli kaMthunywa
INGXABANO yesitshebo phakathi kwamadoda amabili eSigodini, esabelweni seMatabeleland South, iphethe ngokufa kwenye kulandela ukugongodwa ngehloka.
UHloniphani Ngwenya (43) ubhekane lecala lokubulala umngane wakhe uMalizani Tembo (59) ngokumhlasela ngehloka, ngoba wakhetha ukuthenga utshwala kulokuthi athenge isitshebo.
UTembo udlule emhlabeni mhlaka 24 Ncwabakazi 2026, ngemva kokulimala kabuhlungu ekhanda ngesikhathi ehlaselwa nguNgwenya (43) ngoNhlangula.
Isikhulumi samapholisa esabelweni seMatabeleland South u-Assistant Inspector Stanford Mguni, uqinisekise udaba lolu.
Kubikwa uTembo loNgwenya baxabana bebanga ukuthenga utshwala, omunye efuna ukuthenga isitshebo.
Impikiswano le yakhula yaze yaphenduka udlakela, uNgwenya wasethatha ihloka watshaya ngalo uTembo ekhanda.
UTembo walimala kakhulu, watholakala ele-cranial fracture, okutsho ukuqamuka kwethambo.
Ngemva kwalokhu, uNgwenya wabotshwa.
Waqala wetheswa icala lokuzama ukubulala kodwa isimo salolu daba saguquka ngemva kokuba uTembo esedlule emhlabeni mhlaka 24 Ncwabakazi ngenxa yokulimala ayekuthole ngesikhathi ehlaselwa.
Icala lokuzama ukubulala selaguqulwa laba licala lokubulala.
