admin
Johas Moyo
NGENHLOSO yokuqeda indlala inhlanganiso yePractical Action isebenzelana leWater Link isithuthukise ukulima kusetshenziswa amaSolar Powered Drip Garden Systems eSabelweni seMatabeleland South.
UMnumzana John Siambare onguProject Officer kulinhlanganiso ukhuthaze abalimi beMatshokodo eGwanda ukuthi basebenze nzima njengoba bethole ithuba lokuphiwa impahla zokusebenzisa ekulimeni kwabo ezivandeni ngenjongo yokuqeda indlala kanye lokuthi bathole imali.
“Ngaphansi kwaloluhlelo abalimi basebenzisa amanzi ukuthelela izivande zabo. Amanzi la aphuma phansi adonswa ngamandla enjini ezisebenzisa amandla elanga. Amanzi la angena phakathi kwamatanka amakhulu besekuzathelelwa ngama-drips okwenza ukulima lokhu kubelula. Indlela yokuthelela le ayidlalisi amanzi.
“Kukhangelelwe njalo ukuthi abalimi bonke benelise ukuba yingxenye yaloluhlelo kugoqela lasebekhulile ngoba akudingakali amandla amanengi okusebenza nxa kuthelelwa ngalindlela.
“Uhlelo lolu ngolokuthi abalimi basebenze lula, bathole amanzi eduzane njengoba ama-drip esetshenziswa ukuthelela. Okwabo yikuhlakulela izilimo zabo ukuze zikhule kuhle. Abalimi bakhangelelwe ukusebenza bekumaqembu njalo thina sithuthukisa abalimi abahlezi belezivande zabo ezincane sibancedisa ukuthi zikhuliswe kasiqalisi phansi,” kutsho uMnu Siambare.
Uqhubekele phambili wathi bona njengenhlanganiso bafundisa abalimi ukuthi baphatheke kwezokulima izilimo ezivuthwa masinyane njalo babafundisa izindlela zokudinga indawo zokuthengisela izilimo zabo ebantwini abaseduze kanye lakulabo abakhatshana.
“Abalimi sibapha inhlanyelo zokuqalisa ukulima njalo sihle sibaphe inhlanyelo yesilimo esithengwayo kulezonsuku ngoba sifuna balime baxotshe indlala ngapha bethola imali.
“Ngokunjalo kuqakathekile ukuthi abalimi bazwisise umhlobo wezilimo oyabe uthengwa ngaleso sikhathi. Thina njengenhlanganiso sibapha yonke inhlanyelo, okunengi kusuka kibo,” kutsho uMnu Siambare.
Online Reporter