admin
Khulu
Isitho somkami silephunga elibi
NGIYINDODA eleminyaka engu-34 umkami uleminyaka engu-27. Uhlupho lwami Khulu yikuthi nxa evela emsebenzini ufika alale engagezanga njalo kwenza isitho sakhe sangasese sibe lephunga elibi ikakhulu singahlangana emacansini. Ugeza kanye ngelanga ekuseni. Angazi Khulu kumbe ngiyahlupha ngoba mina ngikholwa ukuthi owesifazana kumele ageze kabili ngelanga. Okunye okuhluphayo yikuthi ngimtshele njani kodwa engaze akhubeka.
Impendulo
Awuhluphi mzukulu njalo ayisuwe otshoyo ukuthi umuntu ageze kabili ngosuku, lisiko lomdabuko elithi phambi kokuthi bonke abesintwana bayolala kumele bahlambuluke. Ukugeza lokho okwenziwa ngabesintwana sebesiyalala ayisikho ukuthi yikugeza umzimba wonke kodwa yikulindela intokozo yasemacansini. Lokho kwenziwa yizizwe zonke umhlaba jikelele.
Indlela elula yokumtshela yile, dinga umuntu wesifazane oseduzane laye umbikele lonke loludubo ubusumthuma ukuthi ayexoxa laye umkakho ngendaba zengubo. Amfundise ukuthi wena ndoda lonkosikazi wakho kuyinhlanhla ukuthi ligeze imizimba yenu phambi kokuba lilale. Amfundise ukuthi into eyenza indoda ibelesidina noma owesintwana abe njalo liphunga phakathi kwabantu. Umngane lowo axoxe kabanzi ngokuqakatheka kokuvunula kowesintwana ngentolwane noma ngomgugudu. Amtshele ukuthi kwenza owesintwana angagugi masinya njalo kuyidonsela yothando phakathi kwakhe lomkakhe. Intolwane le iyahlanjululwa engakalali ntambama ngokwenza njalo izithukuthuku ezilephunga leli elikukhathazayo ziyaphela. Amxoxele njalo langamakhwapha abantu besilisa afuna ukugezwa sonke isikhathi. Lonke lelo liyabe lilicebo lokuthi afinyelele ukuhlambulula khonaphana.
Ngenzeni ngendoda engondli umntwana
NGINGUMAMA ole 23 years ngilomntwana oleminyaka emithathu. Ngake ngenda kodwa sehlukana losamfana umntanami elenyanga ezingu-9. Impilo yaba nzima kakhulu ngoba uyise womntwana wayengangincedisi ngalutho. Khathesi sengisebenza usesithi sikhumisane umlotha, sengidideke ingqondo kangisazi ukuthi ngithini.
Ngeluleka Khulu ukuze ngenze isinqumo esiqondileyo.
Impendulo
Mtshele ukuthi kumele akuhlambulule akuhlawule ngembuzi noma ngemali abe sesiyavela ebazalini bakho.
Ayoxolisa ebazalini bakho. Nxa kuyikukhumisana umlotha abadala bayakwazi ukuthi kukhunyiswana njani umlotha. Kawuyekhunyiswana phambi kwabazali futhi indoda leyo ilamanga, yigade uyigade idiniwe usediniwe ehambeni lwakhe akusicala, uyahamba umgadi wenzomba abuye ebuyele kuyo ngokuzibika kubanikazi bomhlambi.
Inzalo iyala
Khulu linjani? Ngicela ungisize inzalo iyala. Ngidubekile.
Impendulo
Ngiyaphila mzukulu. Umumo lo okuwo uyelapheka noma esibhedlela noma ebantwini abalolwazi. Ukwenze kwaba kufitshane. Zama ukungitshela ukuthi ungena amalanga amangaki ezibini. Khonokho kuzangenza ngazi ukuthi kufunekani kuwe. Isibeletho sakho asila silumo na? Umumo womzimba wakho awulansumpa lezi ezibizwa kuthiwa ngamasale na? Wena waqalisa amaphilisi okuvimba inzalo uleminyaka emingaki ngoba ukwala kwenzalo kulezizatho ezinjalo. Inzalo iyala, ulendoda na? Kumbe iyala njani, ngokuzama amadoda amanengi. Phinda njalo ubuye leqiniso sixoxe.
Online Reporter