admin
Kule iviki iphephandaba likaZulu lize lazo njalo indaba ezimnandi njengensukwini nanku phela liliphathele iqembu labaculi abagida kucitshe ilanga, babuye njalo baphatheke kwezemidlalo yobulingisi kanye lakwezokuhaya. Amantombazana akhona angena kuxege ibhulugwe endodeni, kwezemidlalo yobulingisi khona angikhulumi, yizimanga zodwa.
Mthwakazi omuhle kambe kungaba yiliphi iqembu elidume ngezimnandi kangaka ngaphandle kweKhaya Arts iqembu lodumo eliphuma eSizinda khonapha koNtuthu. Othanda ukujabula iviki yonke nansi ingxoxo enambithekayo phakathi kwenkokheli yaleliqembu uFuture Dube (FD) lentatheli yephephandaba likazulu uCornelius Luphahla (CL).
CL: Akuthi fahla fahla jahelibanzi mayelana lembali yakho kanye leyeqembu lakho?
FD: Mina ngazalwa mhlaka 28 Ncwabakazi ngo1984 ePelandaba Clinic khonapha koBulawayo noma nje ngidabuka eBinga esigabeni seSikomena. Ngo-1992 ngangena uGiredi 1 eQueen Elizabeth Primary School eNkulumane 11 koBulawayo ngaze ngayaqeda uGiredi 7 ngo-1998. Ngemva kwalokho ngayafunda uFomu 1 esikolo seMandwandwe Secondary ngo-1999 ngayaqeda uFomu 4 ngo-2002 kulesisikolo.
Sengiqedile uFomu 4 ngaqala ukudlala ibhola kuBangane Football Club ngaze ngama ngo-2005. Ezokucula noma nje ngangiziqale ngisafunda e-primary kodwa ngangingakaculi emphakathini. Ngo-2006 kusiya ku-2010 ngakhokhela iqembu labaculi bezamasiko elithiwa yiSimunye Simunye. Ngemva kwalokho-ke ngasungula elami ngo-2011 okuyilo engilikhokhela khathesi. Kwathi ngethuba ngisungule iKhaya Arts ngangivele ngihlabela leqembu leBlack Mfolosi ngasengiphuma kulo ngo-2012.
CL: Tshela umphakathi Mthembo ukuthi landise ukwenzela ngaphi umsebenzi wenu njengeqembu elidume ngezimnandi njalo abantu bathini ngomsebenzi wenu?
FD: Thina sandise ukujabulisa abantu emikhosini etshiyeneyo egoqela Intwasa Festival, emidlalweni efana lemitshado, amadili okuzalwa kanye lakweminye imikhosi lemihlangano etshiyeneyo. Ngalokhu-ke abantu bayawuthakazelela umsebenzi wethu sibili ngoba nxa sithe sangena sisenza esidume ngakho ngemva kwalokho inengi elisibonileyo liyasifonela lincoma umsebenzi esiwenzileyo.
CL: Njengeqembu selathola izicoco ezingaki ngomsebenzi wenu lo eliwenzayo?
FD: Noma nje sijabulisa abantu kodwa okwakhathesi asikatholi sicoco kodwa sike saphatheka kumncintiswano weChibuku Neshamwari. Okunye njalo sike saphatheka kumncintiswano weStar Bright kwasokusehlula imali yokuthi sihambe eHarare kodwa ngokubona kwami lapha yikho esasizathatha khona isicoco.
CL: Akutsho ukuthi lonyaka ukhangelele ukwenzani njalo ngaphandle kokujabulisa abantu msebenzi bani owenzayo?
FD: Mina ngaphandle kokujabulisa uzulu akukho okunye engikwenzayo ngikhangelele ukujabulisa uMthwakazi kuphela. Ngakho lonyaka umkhulu umsebenzi engiwenzayo ngoba njengeqembu sikhangelele ukukhiphela abantu umdlalo omnandi okwamagama ozabajabulisa kuzwele.
CL: Bunzima bani oyake uhlangane labo njengomculi njalo nkuthazo bani oyipha abaculi labadlali abasacathula?
FD: Njengomuntu odume ngezokujabulisa ubunzima engiyake ngihlangane labo yikuswela imali yokuthuthukisa iqembu kanye lokuhambela abantu endaweni ezehlukeneyo. Lokhu kuyasikhathaza sibili ngoba yikho okwenza singaphatheki kweminye imikhosi etshiyeneyo edinga ukuhanjwa ngemali.
Ngalokhu-ke kubaculi abasacathula ngithi kababambelele bengaze badela ngoba umsebenzi lo unzima udinga ukubekezela. Okunye njalo ngithi kabahloniphe uzulu ukuze bathole abalandeli abanengi ngoba inhlonipho iqakathekile.
Online Reporter