Inhlupho zalamuhla: ‘Ngikhathazekile ngenduku encane’

Ngingenzani ukuze ngigcine umuzi wami?
NGINGUMAMA osanda kwenda ngileminyaka yokuzalwa engu-23, ngicela ungeluleke Khulu ngalokhu okumele ngikwenze lengingamelanga ngikwenze ukuze umuzi wami ungachitheki. Ngamswela ongangilaya kungakho Khulu ngicela ungiphathise.

Impendulo
Into yokuqala yikuzihlonipha mzukulu ukuze umhlaba ukuhloniphe lawe. Nikeza umyeni wakho uthando oluqotho njalo uvume uzehlise kuye labakwenuzala. Uthande umzimba wakho, okutsho ukuba uluju lomkakho kawuphongukuhamba uncindisa uzulu nje. Ungabi ngusomalayini, umuntu ongumhambuma nje kuphela etshiya umuzi wakhe udlalelwa zimpukane. Ziphathe ube linina eliqotho njalo ulandele isiko lemendweni. Ungafiki utshaye imithetho emzini wabantu. Woba ngumama ozithobileyo ngazo zonke izikhathi. Lalapho elingazwisisani khona lesoka lakho kumele wehlise umoya likhulumisane. Ungahambi usembula amakhwapha omuzi wakho emphakathini, lokhu kuzakululaza ebantwini. Uhlale uthembekile kikho konke okwenzayo lomhlaba uzakuthemba. Ube yisitsha sokudlela mzukulu wami, njalo ubelibhuku elimumethe imfundiso eqotho njalo ebambekayo, elekusasa ebalulekileyo. Uhlale umuzi wakho uhlanzekile kunye lempahla zemuli yakho. Ubekwazi okuthandwa ngumyeni wakho emacansini kunye lempilweni jikelele ukuze engabilesizungu phela.

Ngikhathazekile ngenduku encane
Khulu kanti nxa ungumfana njalo ulehloka elincane ungenzani ukuthi libe likhulu. Ngingumfana ofundayo kodwa ihloka lami lincane. Ngiyake ngibone awabanye nginanzelele ukuthi elami vele akulalutho. Ngiyake ngizwe kuthiwa abesifazane bathanda induku enkulu. Pho ngizakuthini ngingathatha? Ngisebunzimeni Khulu, angazi ukuthi ngenzeni ngiyesabela ikusasa yami emacansini.

Impendulo
Ubukhulu benduku kakutsho ukwazi ukugalela kumbe ukuba lesikali nxa umuntu egalela. Bakhona mzukulu abathweleyo okungathi ngumphini wehloka kodwa bengangena emacansini ngokhonapho khonapho nje. Batshiya owesifazana esafuna uhambo luqhubekele phambili. Ubukhulu benduku abutsho lutho mzukulu inkalakatha yikwazi ukusebenza nxa uthe wangena emacansini. Ngaso sonke isikhathi izitho zabantu kazilingani lawe ungakhaleli ukulingana labo. Kwesinye isikhathi emacansini wena uyimbabazane, ungaba lakho ukubamba owesifazana agomele ngobunandi aze akhulume ngendimi zemacansini nje ezingaziwa muntu. Awuzake ubone lapho okutshaya khona umuntu omfitshane. Utshayela ukubulala kungakho-ke lawe lindela ukufika emfuleni uzabona ubuciko bakho. Izolo siselusa bekulesihlahla abafana abebehamba bayelinganisa ngaso ukhulu, bathi singakhula basigamule abanye bengakhohlwa usuke umuntu abe lenkalakatha nje. Kodwa lokhu bekusenziwa yithi izolo ekweluseni mzukulu. Ungaba lakho ukuba ngesikhathi usuthatha abadala bakuphe imbiza yokukuqinisa umhlane hatshi ukwelula ukhulu ngoba isikhathi sesidlule phela.

Ngokabani umthwalo?
Ngileminyaka engu-28, ngendile njalo ngihlala lomkami, kodwa asikatshadi lanxa sewavela. Sesileminyaka emihlanu sisonke. Khathesi ngizithwele umntanethu wokuqala. Inkinga nansi Khulu, ngahlangana emacansini lenye indoda engisebenza layo. Sasisebenzisa ijazi lomkhwenyana kodwa laselidabuka. Khulu ngelanga elalandelayo ngangena esikhathini kodwa kwaba ngokwelanga elilodwa mina ngingena insuku ezine. Ngesikhathi ngihlangana lendoda le, umkami wayevakatshele kibo. Umbuzo wami yikuthi kambe umthwalo ungabe ungowomkami yini kumbe hatshi? Ngiyazi ukuthi kumele ngenze iDNA umntwana esezelwe ukuze ngibe kwazi. Indoda le engahlangana layo esisebenza sonke ithethe Khulu. Ngiyazi ukuthi ngenza ubutshapha obuyangisayo. Ngenzeni kodwa Khulu, ngitshele umkami iqiniso yini?

Impendulo
Lapha mzukulu kufana lokuba sikhasa phezu kwamalahle njalo kufanana lokuba simumethe inkafulakufa. Kodwa ekadeni bekuthiwa ezalelwe esibayeni ngeyakho. Lawe kufanele kube ubengumuntu ofunde isifundo ngobutshapha bakho obungaka. Ngithemba lawe wahle wagebha igodi wakhafulela phakathi ukuba akuphindi kwenzakale lokhu. Wena nguwe owazi ukuma komuzi wakho, nxa ubona ukuba impilo kayingeke ikuhambele kuhle umumethe amalahle angaka, kuhle kwesinye isikhathi ukuwakhihliza nje uvele ubhebhe umuzi wakho. Kwesinye isikhathi kuhle ukaba udinge ubufakazi be DNA ukuze ungahlaleli emnyameni. Khangela ikusasa yakho ngalolodaba lwakho ubone ukuba lukutshiya ngaphi. Kodwa okuqakathekileyo yikuba ubeleqiniso lokuba onguye nguphi njalo uthi usuthatha inyathelo usuleqiniso elipheleleyo.

Kafuni kwehlukana lami
Ngingumama oleminyaka engu-36 njalo ngehlukane lomkami kuminyaka emine edluleyo, esethandana lomunye usisi waze wangitshiya wayahlala laye. Mina ngazitshela ukuthi ngeke ngikhombe indoda elomkayo njalo ngenelisile ukukunqoba lokhu, kodwa kuthe kunyanga edluleyo ngahlangana lomunye ubaba wabika uthando wabayinto yonke ebengiyifisa endodeni lami ngathatheka ngamkhomba, ngasengithola ukuthi ulomfazi, angibanga lendaba lakho. Osekungikhathaza yikuthi ubaba lo kaselandaba lemuli yakhe ngenxa yami. Ngazama ukwehlukana laye kodwa wathi uyazibulala. Kangizimiselanga ukuchitha umuzi wakhe. Ngeluleka Khulu, ngithini ngalubaba?

Impendulo
Ubufakazi bokuthi uzazibulala ulabo yini? Kumbe ubambe elikantulo nje. Izolo engakakuboni wena ubephila njani njalo yini okwenze wangazibulali? Kutsho ukuthi nguthathekile nje lubaba, nxa esiba lesibindi sokufuna ukufulathela igazi lakhe pho wena elihlanganiswe licansi kutsho ukuba engakutshiya izolo nje engathola omunye umama. Libele lendlela elingelasiphala nje leli, awungeke wafukamela impilo yakho ngaye ngoba lawe uzasala ukhala inyembezi zika bula, ususwele lomduduzi. Mlandisele iqiniso ukuba nxa engafuni ukulungisa impilo yakhe lemuli yakhe, kavalelise lapha kuwe ngoba awuzimiselanga ukwenzela enye imuli isihluku sokuba icine isisidla emabhimu wena usugone uyise, njalo lawe ungasala ugone iziboya kusasa esedlulele phambili.Elokuzibulala liqhinga nje kuphela lapha eliba yisiviko. Kutsho ukuthi ngesinye isikhathi lubaba ubalekela ukugcina imuli yakhe, lapha kuwe kungenzeka ukuba kathengi kudla uyimpahla nje, ubadla nje kuphela. Umbono wakho ulokwakha njalo ulobuntu, lubaba kabuyele emzini wakhe imuli yakhe ichiphiza izinyembezi. Mhlawumbe labantwana kabasayi lesikolweni kungela mali yena uyise esidla amabele, esima ngelokuzibulala. Ngibonga umbono wakho omuhle kangaka, umuntu akatsho ukuthi angatshontsha sefuna ukuba akhe ebuseleni, kabuyele kwakhe, ayefeza izopha lika baba emulini yakhe.

Kuqondile na ukuthandana lendoda encane kulami?
Ngithemba Khulu uziphilele. Ngicela ukubuza ukuthi kulicala na ukuthandana lendoda encane kuwe ngeminyaka?

Impendulo
Ngisakhula ngezikhathi zempi yama Jelimani, kwakuvame ukuhlatshelwa ingoma ethi “Love knows no age” uthando alwazi minyaka yomuntu kodwa thina yithi esigcina inombolo lezi ekhanda.Okuqakathekileyo yikuziphatha nje kuphela.Lokhu akutsho ukuba ungathi ungujahana uhambe uyehudulana lesalukazi, kumbe uthi uyintombazana uhambe uyehudulana lekhehla nje. Kuyezwakala nxa umuntu othandana laye litshiyene okweminyaka emilutshwana, engaba mithathu kumbe mihlanu. Kuvamile-ke ukuba abesifazane yibo ababa bancane kulamadoda kube sekusiba yindaba egudwini nxa indoda ingaba ncane kulomfazi. Indlela enkulu yikuziphatha ethandweni lwenu njalo lokuzwisana kwenu hatshi ukuthi abantu bathini ngeminyaka yenu.