Online Reporter
Danisa Masuku
KULENINA lesigabeni seNyathi, eMatabeleland South elenze isihluku ngokuhlalisa indodakazi yalo phezulu kwesitofu esitshisayo, ngesizatho sokumjezisa ukuthi uqambe amanga.
Lokhu kudale ukuthi indodakazi itshe kabuhlungu. Inina leli kubikwa lalibhembe imbanje lisenza isihluku lesi.
Isehlakalo lesi sivele sobala ngesikhathi sisethulwa phambi kukamantshi uMnumzana Challenge Mahembe.
Inkundla izwe ukuba uSakhile Mathe (30), ovela koBadala eNyathi, wahlukumeza umntanakhe ngokuthi uqambe amanga, qede lapho wamjezisa ngokumhlalisa esitofini esitshisayo.
Kubikwa wavuma kumantshi ukuthi wayedakiwe ngokunjalo, wagwetshwa inyanga ezilitshumi lanhlanu esejele. Ubuye wesula inyanga ezinhlanu ngesizatho sokuthi uziphathe kuhle.
Umantshi uthe umntwana ube ngumfakazi oqotho njalo othembekayo.
Umntwana wakhuluma ngokufaneleyo okwenzakalayo ngokutshaywa lokuhlaliswa phezulu kwesitofu esitshisayo.
“Umntwana lo ugcinwe ngunina njalo uthembe yena ukuthi amnakekele. Ubengumfakazi oqotho, othembekileyo kubufakazi bakhe. Lobufakazi bezempilakahle buqinile,” kutsho uMnu Mahembe.
Ezama ukuvikela, uMathe uthe: “Mhlonitshwa, ngiyaxolisa ngokwenzakalayo. Ngangidakiwe. Ngicela inkundla ingangihambisi ejele ngoba yimi engigcine umntwana.”
