admin
KULENINA leZvishavane elibotshwe ngamapholisa lisetheswa icala lokutshada lamadoda amabili lithi lokhu likwenze ngoba indoda yalo yokuqala ibisileminyaka elitshumi lambili ingalisuthisi.
Indaba le ivele lapho uMoreblessing Maridza (41) ohlala ePlatinum Park, eZvishavane, emiswe phambi kukamantshi u-Archie Wochionga, ekhangelane lecala lokulotsholwa ngamadoda amabili andubana atshade lawo onke.
Umsolwa watholakala elecala ngemva kokuba evumile ukuthi ulecala wasegwetshelwa ukuhlala ejele okwenyanga eziyisithupha.
Inyanga ezintathu zesigwebo sakhe zibekwe eceleni waphiwa lesimiso sokuthi abhadale imali engange $5 000 kukhangelelwe ukuthi angadali icala elifana laleli kuminyaka emihlanu elandelayo.
Umsolwa ubikele inkundla ukuthi umkakhe wakuqala, uJames Chivandire, wagula umkhuhlane wengqondo okwenza wangenelisi ukwenza umsebenzi wakhe wokuba ngubaba ekhaya okuyikho okwamfuqa ukuthi ayelotsholwa ngenye indoda.
Inkundla yabikelwa ukuthi uMaridza loChivandire batshada umtshado we Marriage Act Chapter 5.11 ongavumiyo ukuthi umuntu osemtshadweni athandane kumbe athathwe kumbe ukuthatha omunye njalo umuntu.
UChivandire kubikwa waqala ukugula umkhuhlane wengqondo ngomnyaka ka 2000.
UMaridza walotsholwa yindoda yakhe yesibili uDavid Mhuru, basebesiyatshada umtshado ofana lalo ayelawo lo Chivandire bahle baqala ukuhlala bonke.
Indaba le yavela egcekeni lapho esinye isisebenzi semawofisini eRegistrar-General sinanzelela ukuthi uMaridza wayesetshada okwesibili.
UMaridza wathi yena loChivandire baqala ukuhlala bonke njengomfazi lendoda ngomnyaka ka 2000 engakaqali ukugula umkhuhlane wengqondo.
Inkundla ithole ubufakazi bokuthi uMaridza walotsholwa wasetshada loMhuru esazi mhlophe ukuthi utshade okusemthethweni loChivandire ngaphansi komthetho weMarriage Act Chapter 5.11.
Umtshutshisi wecala leli uTinashe Muponde wabikela inkundla ukuthi kunyanga kaMpandula njalo ngelanga elingasaqanjwanga uDelphino Chikwanda osebenza emahofisini kaRegistrar-General eZvishavane, wayekhangela amaphepha omsebenzi wasenanzelela ukuthi uMaridza ulemitshad emibili, yonke ingaphansi kukaMarriage Act Chapter 5.11.
UChikwanda wamangalela umsolwa emapholiseni okwabangela ukuthi abotshwe.
Online Reporter