admin
Imfa yinto ezondwa ngubani lobani ophilayo emhlabeni, ngoba khona ukufa kuza lezinhlungu losizi kulabo abayabe bethe batshiywa ngomunye wabo abasondelelene laye kakhulu.
Ukufa kufika njengesela kubani lobani. Kakho ngitsho loyedwa ongathi ubekulindele ngoba kuyinto ebuhlungu kakhulu ezimulini.
Omunye kuyabe kungumzali, iguquke impilo yabantwana sebephenduke intandane baqale ukuqansa intaba yodubo ngoba okade ebanakekela engasekho emhlabeni.
Wawuzwe isikhathi esinengi nxa umuntu esizwa umbiko wemfa uzwe bethi hawu bakithi, ngabe kwenzenjani bengikhuluma laye izolo engitshela ukuthi lokuthi.
Abanye njalo ngabathi sebesenga lezimithiyo uzwebethi khonaphana esanda kwedlula bengisanda kukhuluma laye kumakhalekhukhwini esithi kanje lakanje.
Noma umuntu ubeyisikliwi kumbe umgulukudu wesigeva, mhlawumbe noma kade engumthakathi wezigodo akulamuntu okhuluma kubi ngomufi, okukhomba obala ukuthi ukufa kuyinto embi.
Asazi kumbe bayabe beqinisile abavame ukuthi ngicine ngikhuluma laye esithi ngoba iqiniso laziwa ngosezithulele laye khepha njengoba eyabe engasekho ukuthi afakaze, sekuthenjwa lona lelo.
Ngikhumbula kwathi kusanda kwedlula omunye osomabhizimusi, umzukulu wakhe wathi nguye owacina ukukhuluma lomalumakhe engakaphangalali, wayethe kasalethatha inotho yakhe mamo yabe isiwuchithile umuthi inkonyane abomdeni batshaya bemba phansi kwathiwa uyafeketha nje ukhulelwa ngumhawu.
Wena ucine nini ukukhuluma losanda kwedlula?
Ayixabene.
Umlobi uthinteka ku: 0714355641
Online Reporter