admin
Pathisa Nyathi
BATSHO beqinisile ukuthi akulahlwa imbeleko ngokufelwa. Phela kuzazanywa futhi engxenye ngesikhathi esizayo inkonyane walakahla. Kuthiweni njengoba kuzazanywa futhi kuthi inkonyane walakahla. Kuthiweni-ke ngoba usane kaluphathwa ngamahlamvu? Sikhuluma ngezulu eline abanengi sebedelile bethi kalisekho izulu elizakuna.
Laphela ithemba abantu badangala bathi bona ukuthi lizakuna kufana nje lokuthemba ize leze.
Watsha qhu umlimela owawusemasimini abantu. Ngitsho lawo amabele aqala ukubuna atshwabhana acina esitsha qhu okokuthi wawungeza lomentshisi insimu yonke iyaqhuqhumba. Lamahlamvu aseqale ukuguqula umbala kukhanya ukuthi izihlahla zijonge ukuphusisa amankonyane azo. Phela nxa amanzi engekho lokudla okusemhlabathi akuncencetheki kufana qho lokuthi ukudla akukho. Izihlahla zingahlangana lomumo onjalo zithi kungcono ukukhalala abantwabazo zimelele isikhathi esizayo. Yikwenza kwemvelo lokho, okuyindlela yokuziphilisa lokuzisiza.
Bavele besitsho ukuthi uMdali kakhalalelwa. Umuntu uma ngethemba kuze kwehlule sibili. Line okuginyisa amathe kuyole iviki. Like lathi liqala lakhwaza kwathithibala uwonke lowonkana. Phela bathi lingona liba lenhloni lingabe lisana. Lingabe litshaye umuntu, isihlahla, idwala loba umhlambi wezinkomo. Sezwa ngenkomo eyatshaywa lethole layo yinkosazana. Abanye abantu labathutha labatshiya kude le. Kodwa ngokuya kwesikhathi lathobeka lana ngomusa langothando: ngokuthula.
Sasesivele sesijwayele ukuthi liyathwala kodwa licine ngokuphunza. Pho njengoba singazi ukuthi limiswa njani sisuka siswele iqhinga lamano kunye lamasu. Akubanga njalo-ke ngalesi isikhathi. Lana, lana, lawohloka saze samangala ukuthi kanti sonke isikhathi beliphunza kwenzenjani? Lana lipholile lithule du kuzwakala u-tshwa-tshwa-tshwa kuphela amathonsi abanzi eqabuja indebe zomhlaba ezasezome zaze zaqhezuka sengathi ngesiklayiweyo kumbe udaka lwesiziba selufulathelwe ngamanzi.
Lotshani obasebavalelisa sekusobala ukuthi isihuba sakutsha, isibhongela egogweni baphakama bagiya bantela bathi lokuklanasa ngobuhlaza babo. Ngesikhatshana nje wabona sekuhambahamba izintombi zomhlaba ezibomvu gebhu ezibuthakathaka amagama. Zahwitha inkonjane zawahwitha amavimbandlebe lamahlabuse zalala ngezibomvu klebhu. Lamadlamedlu ezwakala esebhonga emachibini kwazise ayesethelwe ngamanzi ayezimpophoma ezixhwathayo eqonda emachibini. Avunyelwa ngamaxoxo amancinyazana atshwililiza okuqumbaqumbe amadlamedlu wona avungame ayivuma ngebhonga likaNkabinde oweZintombi zesiManjemanje.
Umhlaba uchelesiswa uncibilikiswe lizulu. Izulu ngamafutha omhlaba othi nxa usuwagcobile kwasuka imidlopha umhlaba ucwebezele kusinsitheke izilwanyana zasendle kuvume lemvevane zemoyeni Lamathuku ayaqala ukufuquza emqubeni ngoba usungumhluzi obuthakathaka. Bakhona ababelokhu belawo umumbu ongakalahli ithemba njengabaniniwo. Sesichinsile lathi esahle safulathela amasimu sazenza oSomdali abazi konke. Abanye ngasebeqale ukuthenga inhlanyelo kutsha. Labo bakhuluma ngenhlanyelo ethiwa yinkawu ngoba yona iyaphangisa ukutshakaza ifake ingqamu. Phela lalo selithobekile kaliselalo ikhoza leliyana ebelihangula umhlaba uze uwuzwele.
Abafuyileyo bayabobotheka ngoba uhlaza selukhona lezifuyo zabo zizabusaha zisabusaha. Lokudabula zizadabula ziwawise ngobunengi umnyaka ususiyaphela lapho izulu lizakuba selisewule. Kusuka kusikhumbuze ukuthi izikhathi ziyaguquka. Sekufanele lathi silalele sihambelane lawo umumo womkhathi osukhona. Indima zethu sekufanele zitshiyane. Kufanele kubekhona ezakuqala kodwa singahlanyeli indima zonke. Kungatsha ezakuqala engxenye singaphephela kwezamuva. Kwesinye isikhathi kungabakuhle sihlanyele indumba nxa izulu liphuzile njengalonyaka. Asazi-ke kumbe Elinino ndini lowo usevalelisile. Singathaba loba ehambe engavalelisanga.
Okukhulu yikuthi ahambe sisale sifana lobuchakide nxa imamba yalukile.
Indlala idlisa amanyala iphinde isifundise amano okuziphilisa. Phela kayisindwa ngowayo. Isafanele ibone amaqhinga ukuze iwuphakamise uyikhele amanzi, uyivodlozele izihlahla ifinyelele amahlamvu aseziqongweni.
Besivele sesiwakhandile amasu lamaqhinga. Angithi ngake ngatsho ukuthi izinkomo zizakudla isinkwa.
Sasesikubonile lokhu lokuthi kuyasebenza. Iqhinga lidalwa kumbe lizalwa zinswelo lokukhalipha kwengqondo yona ehluza ikhethe okungasiza abantu nxa sebesetshatshalazini njengentuba yengqathayi zembuzi!
Online Reporter