Inkezo entsha kuBPA

YiNtatheli kaMthunywa
AMAQEMBU omdlalo we-Pool koBulawayo kumaligi wonke, azancintisana kunkezo eyodwa, okuzaba ngokokuqala kulumdlalo.

Lokhu kuza ngemva kokuba inhlanganiso ephethe umdlalo lo koBulawayo ithe isilenhloso yokwengeza imincintiswano kumaqembu ayo.

Inyathelo leli alikaphumeleli ngoba iBPA isadinga usekelo lwamankampani angaphathisa ngemali.

Amaligi amabili angaphansi kweBulawayo Pool Association, iDivision 1 le-Premier, azalwela inkezo le ezadlalelwa umnyaka wonke.

Isikhulumi seBPA uDonald Wadawu utshele iphephandaba likazulu ukuba bazanxusa wonke amathimu njalo bakhangelele abadlali abedlula 1 300.

“Sikhangelele ukuthi sinxuse amathimu wonke labadlali abangafika 1 300. Ukusungulwa kwenkezo le kuzabaluleka kakhulu kuligi yethu ngoba akukaze kwenzeke.

“Okwakhathesi inkezo yethu ayikatholi usekelo lwamankampani, kodwa akhona amanye esisakhulumisana lawo.”

Kusenjalo, I-BPA ithe iqoqa ukudibanisa amaqembu ayo emhlanganweni lapho azakhuthazwa ukuthi ancedise abasakhulayo ukungena kulumdlalo.

UWadawu uveze ukuthi sebekhulumisane leSports and Recreation Commission ukuthi inhlanganiso yabo iphitshekela ukufundisa okhekhe umdlalo lo.

I-BPA ibike ukuba lokhu kungenye yemisebenzi yabo yokusebenzelana lozulu kwezengqubekela phambili kuleli dolobho.

Amaligi wonke angaphansi kweBPA akhangelelwe ukuthi aqale imidlalo ngeviki ezayo.