admin
Joel Ndlovu
ABAFUYE inkukhu sebekhuthazwe ukuthi bahlalise inkukhu zabo lapho okungela msindo khona ngoba uyahlukumeza inkukhu emoyeni zicine zingasadli kuhle.
Ekhuluma lentatheli kaMthunywa uNkosikazi Ntombizethu Ndlovu ongumfuyi wenkukhu esabelweni seMatabeleland North uthe inkukhu azithandi msindo ngakho-ke kuqakathekile ukuthi abafuyi benkukhu bahlalise inkukhu zabo lapho okungela msindo njalo lemitshina esetshenziswa esilugwini akumelanga kube ngebanga umsindo.
“Abafuyi kumele bananzelele ukuthi imitshina esetshenziswa ukupha inkukhu ukudla leminye nje esetshenziswa lapho ayibangi msindo omnengi ongakhathaza inkukhu.
“Nxa kulendingeko yokuthi kulungiswe imitshina eyephukileyo engasasebenzi kuhle kumele abafuyi bananzelele ukuthi ayilungiswa ngesikhathi inkukhu zilele ziphumula njalo nxa ilungiswa kumele kwenziwe icebo lokuthi kungabi lomsindo ozaphambanisa lezo zifuyo,” kutsho uNkkz Ndlovu.
Uqhubekele phambili esithi umsindo ubangela ukuthi inkukhu zibekele amaqanda amalutshwane.
“Inkukhu nxa zihlukuluzwa ngumsindo zidla ukudla okuncane okwenza nxa kuzinkukhu zamaqanda zicine zibekela amaqanda amalutshwane. Ngokuya kwesikhathi zitshona zidiniwe ngoba ziyabe zisehluleka ukulala ngenxa yomsindo.
“Abafuyi kumele bakhuthaze izisebenzi zabo ukuthi zingamemezi njalo zingatshingelani duze lalapho okulenkukhu khona ngoba ziyabe zisenza umsindo. Izisebenzi kumele zikuqakathekise ukuthi zenza umsindo omlutshwane ongasoze ukhathaze inkukhu,” kulandisa uNkkz Ndlovu.
Uphethe ngokuthi inkukhu njengabantu, kuqakathekile ukuthi isikhathi sazo sokuphumula sihlonitshwe.
Online Reporter