Online Reporter
ZINENGI izaga lemitsho ekhuluma ngobuhle lobubi bemali enengi, ezifanana lokuthi imali yimpande yesono, njalo lencwadi engcwele ekaMvelingqangi iyakufakaza ukuthi omunye wabafundi
bakaJesu, uJudas Scariot wamthengisa ngenhlamvu zesiliva, ngoba inhliziyo yakhe isingenwe ngupongwe kaSathani.
Banengi abangasekho emhlabeni ngenxa yokuthi bathi besiba lethuba lokuthola imali enengi baziphatha butshapha ufice sebengasaziphathi, abanye babetshintsha abafazi kungani batshintsha amasokisi.
Ngikhumbula ngisakhula ngangidlala unobhutshuzwayo, kwathi ngoba indoda ezala mina yayiqakathekisa imfundo yayingangikhuthazi ukuthi ngidlalele amaqembu amakhulu, kwathi sekumele ngiyedlalela elinye iqembu elikhulu kwelinye idolobha elisempumalanga wafunga wagomela ethi kangikhuthalele isikolo ngoba ngalezonsuku unobhutshuzwayo wayengabhadali kangako.
Abanye abangani bami abahamba bayadlalela lelo qembu, bathi sebehola imali njalo lenkakhayi zabo zingakasaziwayo amantombazana enza okokubhuza okwempukani zibhudlukela esigubwini, ngikhuluma kunjenje sebadliwa ngumuhlwa, omunye umngane wami ngelinye ilanga ebalisa abangani bami asebayakobhekabezayo, wathi mhlawumbe ngabe lami ngaqinisa ikhanda ngadlala ibhola mhlawumbe ngabe kangisekho emhlabeni.
Banengi abantu esibaziyo abathi ngokuthola imali batshintshe sibi sokuhamba ungakhangela abahlabeleli abanengi ngesikhathi sama-90s bafa ngobunengi ngoba besehlulwa yikuziphatha ngenxa yodumo lemali abasebelayo. Khona kufuna nje ubelayo elingeneyo hatshi inqwabanqwaba ngoba ucina lempilo ungasayikholisi, imnandi uyithola iphele uyithole njalo.
Nxa usakhumbula kwathi ngemva kokuba othebula, ngitsho abanewethu abalwela impi yenkululeko inengi labo bathi sebephiwe imali zokubonga ukuzimisela kwabo ababeyibiza bethi ngama 50kg inengi labo abayikholisanga ngoba sebethatha amakhosikazi amanengi abanye besehlukana labomkabo sebegida emabhawa labomahotsha bafa buthumuthumu.
Zibuze lawe ukuthi aluba ngabe ulemali enengi ngabe uyaphila na?
Ayixabene.
