— Inkundla kazulu — Phos’ elakho Kawasebenze ama Old Students Associations!

Ngihleli ngisizwa abadala bethi kuzalwa okhulayo njalo abanye bethi isizwe ngesizwe sakhiwa ngabanikazi. Kuliqiniso impela lokho.

Ngithanda ukubonga imisebenzi emihle enziwe ngabantwana abafunda kwesinye isikolo engafunda kiso kuzinga eliphansi. Kwaqala kungani ngamandlwane omakholwa ngokubona njengoThomasi wase bhayibhilini, bechothoza bethi bafuna ukuzenza obani abangakha isikolo, lokho kufuna abantu kumbe amakhiwa abalezimali kuzwa.

Bahlanganisa amakhanda lababantwana, okwamanje inengi labo sekungabobaba labomama njengoba lawe usazi ukuthi abantu bakithi bagcwele kumagumbi amane omhlaba. Ngaze ngakhumbula omunye ubaba owathi akula lizwe elingela sizalwane seZimbabwe, bebathandela ukukhuthala emsebenzini langokukhwabitha imfundo yabo.

Abanye abafowethu abaseMelika bathumela izimali kwakhiwa izindlu zababalisi, umbalisi munye ngamunye usesenelisa ukuhlala lemuli yakhe. Kuthe abanye abaseGoli njengoba injiva uzazi zathenga ucingo lokugombolozela iguma lesikolo sekungenwa ngegedi njalo sekulepholisa elilindayo egedini.

Lelopholisa yilo elikupha imvumo yokungena esikolo nxa engathi kawungeni yikho lokho. Zabuye zathenga ama-solar ukuthi nxa kungelamagetsi kusale lokhe kuyibunkanyankanya angathi kusedolobheni.

AbaseCanada bona bagebhisa umgodi wamanzi, kwenziwa isivande, kulinywa imihlobo yezilimo ezehlukeneyo khonapho. Abanye banika isikolo izifuyo ezehlukeneyo ezigoqela ombuzi, lezimvu. Abanye abangosomabhizimusi banikeza isikolo inkukhu zenyama lezamaqanda. Izakhamizi zaqhatshelwa imisebenzi eyehlukeneyo esikolo lesi.

Isikolo sabuye sathengelwa lezingwalo zabafundi ukuze kungabi lombalisi othi uyehluleka ukufundisa isifundo esithile ngenxa yokuthi kalamabhuku.

Amanzi okunatha bakha ezimpompini sekungani yisikolo esisedolobheni sona sisemakhaya, lababalisi abazukuthiwa bazofundisa lapha ngibona bezasuka nzima ngoba yonke into ikhona, kwathengwa lebhasi yesikolo.

Mhla besiya edolobheni ukuyahola bathwalwa bonke bayethenga abakuthengayo iphinde ibabisele esikolo.
Nginanzelele ukuthi ngemva kokuthuthukiswa kwesikolo, lempumela yabafundi kumihloliso isikhuphukile njalo abazali abalabantwana abafunda kuzikolo eziseduze sebebasusa bebaletha kwesakithi ngoba bekhwabitha ukuthi imfundo yakhona isisezingeni eliphezulu.

Isikolo singaba sihle, izinto zakhona zonke ziba zinhle kusukela ezifundweni, kumncintiswano eyehlukeneyo ezokugijima, imidlalo yebhola kunye lekuhlabeleni, isikolo sakithi sesihlala siphezulu ngoba yonke into yakhona yenziwa ngohlonzi.

Ngesizatho lesi engisibethe phezulu ngithanda ukugqugquzela abafowethu laye wonke umuntu jikelele ukuthi kabazame ngazo zonke indlela ukuthuthukisa izikolo lapho abafunda khona.

Ukubambisana kwenza umsebenzi ubelula. Abantu bangahlangana babe ngamaqembu, babe lombono munye, izikolo zethu zingathuthuka singabi lokhe sikhala ngokuthi uhulumende kasenzeli lokhu lalokhuya, kasithole lathi sesiphambili.

Kwesakithi isikolo sekusizakale intandane ezinengi zibhadalelwa indleko zesikolo ngemali zamaqanda enkukhu athengiswa esikolo, lenkukhu zesitshebo.

Nxa kulemidlalo emikhulu efanana lokuphiwa abantwana imivuzo abayabe benze kuhle emihlolisweni kunxuswe abazali kuvele kuhlatshwe imbuzi zibembili, akusatshonwa kubhodwa ngezigaba kudingwa imbuzi.
Ayixabene!