Online Reporter
Nkosilathi Sibanda
ABASAKHULAYO bakuleli sebephiwe ithuba lokuthola usekelo lwemali ngokusabalalisa imibono lamacebo okuthuthukisa amabhizimusi ezimbamgodi, kumncintiswano weMine Tech Innovation Challenge 2026.
Uhlelo lolu, luqhutshwa ngokubambisana phakathi kwe-United Nations Development Programme (UNDP), uHulumende leZimbabwe School of Mines.
Kuhloswe ukukhuthaza abasakhulayo ukuthi basebenzise i-technology ukuletha indlela ezingathuthukisa ukusebenza kwezimbamgodi, kuvikele izisebenzi lokwengeza inani lamatshe aligugu enjiwa elizweni.
Phezulu kwalokhu, bazaphinda bathole ithuba lokuguqula imibono yabo ibe ngamabhizimusi asebenzayo, ngesikhathi bexhumaniswa lengcitshi lalabo abasekela ngemali.
I-UNDP ithe abalitshumi abazafinyelela esigabeni sokucina bazathola uxhaso lwemali yokuqhubekisela phambili imisebenzi yabo.
“Abazafinyelela esigabeni sokucina bazathola njalo ithuba lokusebenzisa leMineTech Hub, ukuqeqetshwa zingcitshi, ukuqeqetshwa ngendlela yokuzilungiselela ukuhlangana labasekeli lokuncediswa okwenyanga eziyisithupha ngaphansi kohlelo lokukhulisa amabhizimusi,” kutsho i-UNDP.
Uhlelo lolu luvulelwe bonke abasakhulayo abaleminyaka engaphansi engu-35 yokuzalwa.
I-UNDP ithe uhlelo lolu luzanika abasakhulayo ithuba lokususa imibono esesigabeni sokucabanga bayise esigabeni lapho engasetshenziswa khona emsebenzini wezimbamgodi.
“Ilanga lokucina lokufaka izicelo ngoLwesihlanu, mhlaka 2 Mfumfu 2026.
Izicelo zingafakwa ku-inthanethi kuMineTech Innovation
