admin
MUKURU wezvedzidzo mudunhu reBindura akaudza Kwayedza kuti pasi pemutemo mubumbiro idzva, mwana musikana haatenderwe zvachose kurangwa achiita zvekurohwa nemudzidzisi.
Akataura mashoko aya zvichitevera nyaya yakaitika pachikoro cheRutope Secondary School, kwaMusana, apo pane runyerekupe rwekuti mwana musikana weForm 2 akarohwa nemudzidzisi wake achibva azotanga kurwara nemusoro achiita seabatwa nemamhepo.
VaJoramu Mupunza, avo vanova District Education Officer (DEO) weBindura, vanoti mwana wechikoro mukomana ndiye chete anobvumirwa kurangwa nekurohwa, asi izvi zvinoitwa bedzi zvichitungamirirwa nemukuru wechikoro.
“Mutemo wedu unoti mwana musikana haarohwe zvachose asi mukomana anorangwa mukuru wechikoro aripo, achiona,” vakadaro.
Votaura nezvemusikana wekunzi akarohwa nemurairidzi wake ndokubva atanga kubvotomoka paRutope Secondary, havana kubvuma kana kuramba kuti mwana uyu akarohwa.
“Tine varairidzi vedu vatatu vakaita dambudziko nevabereki vachipomerwa nyaya ine chekuita neSatanism. Izvi zvinhu zvakaita zvekurongwa, hakuna nyaya yakadaro uye hazvina chokwadi izvi.
“Hatizivi kuti chinangwa chevabereki ava ndechei saka vadzidzisi ava, nekuda kwekupomerwa nyaya idzi nekusawirirana nevabereki, vakazongoona kuti vabve zvavo pachikoro apa voenda kune zvimwe zvikoro zvainge zvakanaka,” vakadaro VaMapunza.
Online Reporter