Online Reporter
Rutendo Nyeve
KULEPHOLISA elisebenzela eGweru
Police Protection Unit (PPU) eletheswa icala lokutshontsha omakhalekhukhwini ababili omunye ongowomngane wakhe.
Ipholisa leli, uThulani Sibanda (24) umiswe phambi kukamantshi weVictoria Falls uMnumzana Gift Manyika ngoLwesihlanu njalo kazange achithe isikhathi senkundla ngoba uhle wavuma amacala akhe.
Umantshi uthe ayevalelwa ejele aphenduke emthethwandaba kusasa ezonikwa isigwebo sakhe.
Umtshutshisi kulelicala, uNkosikazi
Portia Moyo ubikele inkundla ukuthi kucala lokuqala uSibanda watshontsha umakhalekhukhwini womngane wakhe wohlobo lwe Itel A70.
Kubikwa uSibanda wavakatshela umngane wakhe mhlaka 12 Nkwenkwezi ngo 7 ntambama.
Kubikwa ababili laba bahlala phandle egumeni belalele izingoma ezazitshaywa kumakhalekhukhwini womngane wakhe wohlobo lwe- Itel A70.
Kubikwa umamangala wabizwa ngumkakhe watshiya uSibanda lomakhalekhukhwini.
Kubikwa ekuphendukeni kwakhe umamangala wafica uSibanda esehambile lomakhalekhukhwini.
UNkkz Moyo uveze ukuthi umamangala watshayela uSibanda ucingo wathembisa ukuthi uzamphendukisa ngosuku olulandelayo.
Umamangala wazama ukudinga uSibanda kodwa kazange amthole njalo le-sim card wayeseyikhiphile kumakhalekhukhwini.
Indaba le yabikwa emapholiseni okwenza umakhalekhukhwini atholakale kuNyasha Samsun owachaza ukuthi wathenga umakhalekhukhwini lo kuSibanda.
Umakhalekhukhwini lo ubiza US$270-00.
Kucala lesibili, kubikwa ngemva kwensuku ezimbili mhlaka 14 Nkwenkwezi ezitolo zeMoringa Shopping centre, eFolosi uSibanda wathatha iSamsung Galaxy eyesisebenzi esithengisa esitolo.
Kubikwa uSibanda wafika wazenza umthengi olindele ithuba lokuthenga umamangala uthe elokhu ephathekile ngomsebenzi wakhe uSibanda wathatha umakhalekhukhwini wakhe wahamba engabonwa muntu. Umamangala wasala edinga umakhalekhukhwini wakhe kodwa wamswela.
Kubikwa mhlaka 15 Nkwenkwezi uSibanda wabotshelwa elinye icala lokutshontsha uthe esekhuthuzwa izikhwama kwatholakala umakhalekhukhwini ayemtshontshe ezitolo.
Umakhalekhukhwini lowo wayebiza US$200.
