IHonda Fit ebithwele i-gas ivutha umlilo eNkulumane

Sikhumbuzo Moyo

KULOMTSHAYELI wenye imota yohlobo lweHonda Fit obonga abaphansi ngokusila kwakhe ngemva kokuba imota yakhe ilumathe umlilo, yatsha yaphela du, eMayenziwe Shopping Centre, eNkulumane, koBulawayo ngoLwesine.

Imota le ibithwele ama-gas cylinder okucatshangelwa ukuba enye yawo ibivuza, okuyikho okudale ingozi le.

Abafakazi abaqotho babika ukuba babukele baswela ukuthi benzeni nanko phela besesaba ubukhulu bomlilo odalwe yikuvuza kwe-gas. Kubikwa iHonda Fit itshe kwasala amazenge.
Isikhulu sogatsha lweFire Brigade kukhansili yakoBulawayo, uMnumzana Mhlangano Moyo uthe phakathi kwemota bekulama gas cylinder, enye eyi-48kg esuke yavuza kwabangela umlilo.
“Imota le ibilama-gas cylinder njalo enye yawo ilumathe umlilo. Ngenhlanhla, akulamuntu olimeleyo,” kutsho uMnu Moyo.

Uthe abantu kabatshiyane lomkhuba wokuthwala ama-gas cylinder ngendlela engayisiyo. Ugatsha lweFire Brigade kumalanga adluleyo luqhube umkhankaso wokufundisa uzulu ngengozi zokungaphathi kuhle i-gas.
“Siyazama ukulimukisa lokufundisa umphakathi ngendlela zokuphatha kuhle amagasi.”