Online Reporter
Mthabisi Tshuma
KULEPHOLISA okubikwa latshaya isibotshwa saze safa laselizama ukufihla icala leli ngokuquma quma isidumbu saba zingxenye ezincane yayaziphosela esambuzi.
Isehlakalo lesi senzakale esigabeni seMalalume eBulilima.
UConstable Blessed Moyo, osebenzela enkambeni yeMalalume ucatshangelwa ukuthi ulesandla kucala leli kulandela ukutholakala kwezitho zesibotshwa asibopha ekuqaleni komnyaka ziphoselwe esambuzi.
Isambuzi lesi kubikwa singemva kwekilinika eyiyo elenkamba yamapholisa.
Izakhamizi ziveze ukuthi uConstable Moyo wancediswa ngezinye izakhamizi ukuvala icala leli.
Imfihlo le ivele emphakathini ngemva kokuba kubonakale ukhakhayi, amathambo, izankosi, ingqamu elegazi yohlobo lwe-Okapi kunye lempahla ezidabukileyo.
“Besilethemba lokuthi uyasivikela kodwa ubengusathane phakathi kwethu,” kutsho omunye othengisa kwesinye isitolo eTjaguta Business Centre.
“Ubesebenzisa amandla ngendlela engayisiyo, ubesihlukuluzela utshwala khathesi sokuyilokhu? Kumele ayebolela ejele.”
Abafakazi abangamapholisa baveze ukuthi indaba le iqale ekuqaleni kwenyanga kaNhlolanja lapho esinye isakhamuzi uMelisa Ndlovu athola indoda itshontsha ukudla kanye lempahla emzini wakhe.
Indoda le yabaleka kodwa yacina ibotshwa uConstable Moyo.
Wafakwa izankosi wahanjiswa enkambeni yamapholisa lapho uMelisa labanye abathathu abathi nguye otshontshileyo.
Abafakazi baveze ukuthi indoda eyathi ivela eBinga njalo okwakungathi kayiphilanga kuhle engqondweni yatshaywa nguMoyo ngoswazi lwephane, imvubu, uphini, kanye lomphini wehloka owenziwe ngepulastiki waze wavuma icala leli.
“Wacela amanzi wathi uselesiyezi,” kutsho umfakazi olipholisa. “Baphenduka enkambeni yamapholisa lapho uMoyo athi abanye kabahambe uzalungisa imota yokuya koBulawayo. Indoda le kayizange iphinde ibonakale iphila futhi.
Mhlaka 22 Nkwenkwezi, kwabonakala ukhakhayi kanye lamathambo esambuzi esingemva kwenkamba yamapholisa.
Ukuhlolwa kwamathambo kwaveza ukuba ngawendoda eyacina ukubonakala isezandleni zikaConstable Moyo.
Abaphurofethi kunye lezinyanga babizwa yizakhamizi ukuzokwembula iqiniso, lapho okwavela khona lokhu.
UConstable Moyo wabotshwa wancitshwa ibheyili. Umiswe phambi kukamantshi wePlumtree mhlaka 23 Nkwenkwezi phambi kukaMnumzana Mark Dzira.
Umtshutshisi kulelicala ngu-Arnold Mudekunye.
“Indoda le ibibona angathi ingacatsha ngemva kwe-unifomu,” kutsho esinye isakhamuzi esingathandanga ukuqanjwa ngebizo.
“Kodwa amathambo ayakhuluma. Sifuna umthetho uthathe indima yawo ngecala lomphefumulo awuchithayo.”
UMlisa uSenganyondo walile ukukhuluma ngendaba le wathi indaba le isezandleni zemthethwandaba.
Isigaba sonke sifuna impendulo.
“Kasisizo ziwula. Indoda le yabulawa yangcwatshwa. Kodwa amadlozi alile ukuthi athule,” kutsho isakhamuzi esikhulileyo.
