Online Reporter
YiNtatheli kaMthunywa
UMONGAMELI uMnangagwa izolo uncome amankampani azimele wodwa ngokudlala indima enkulu kunhlelo zikaHulumende zokuthuthukisa amabhizimusi kuleli.
Ukhulume lokhu ngesikhathi kusethulwa imitshina emitsha eNational Foods eHarare ngoLwesine.
Uthe kuyisibonelo esikhulu sokusebenzelana kwamankampani loHulumende njalo kutshengisa ukuthi iZimbabwe iyenelisa ukuthi incintisane lamanye amazwe.
Imitshina yeNational Foods le, ebiza imali efika iUS$7 miliyoni, ngeyokupheka ukudla okugoqela ama-cereals, amabhisikiti, le-pasta.
“Lamuhla, siqinisekisa ukuthi iZimbabwe ilamandla okululungisa ukudla esikudlayo lokuncintisana lamankampani asemhlabeni jikelele, ikhuthazwa yikufakwa kwemali, imitshina yakulezinsuku lokuthanda ilizwe.
“Ngiyakukholwa ukuthi inhlelo ezinjengalezi zizaphathisa ekuthini uhambo lwethu olubheke kuVision 2030 luphangise, lulethe ukuthuthuka komnotho, impilo engcono, lokuzigqaja kwesizwe. Ngakho-ke kasiqhubekeni sisebenza ndawonye sisekela inhlelo eziphakamisa ilizwe lethu, sizinike amandla, sakhe iZimbabwe ezimeleyo,” kutsho uMongameli uMnangagwa.
UMongameli uthe imitshina emitsha le izaphathisa ekunciphiseni inani lokudla okuvela kwamanye amazwe.
Imitshina le ikhipha amathani angu-1 200 awe-pasta ngenyanga, isebenzisa amathani angu-1 500 engqoloyi ngenyanga.
UMphathintambo wogatsha lwe-Industry and Commerce kuHulumende, uMangaliso Ndlovu uthe ulokujabula ngokubona impumelelo enjengale.
Online Reporter