Online Reporter
Nkosilathi Sibanda
I-NATIONAL Aids Council isikhuphe umbiko odanisayo wokuthi isabelo seMatabeleland South siyakhokhela kuleli ngenani labantwana abendiswayo labakhulelwa besesikolo.
Kubikwa ngomnyaka odluleyo, amankazana angu-6 000 azithwala, kwendiswa angu-85 372. Kuzibalo lezi, izigaba zeNsiza leBeitbridge zihamba phambili.
Esigabeni seBeitbridge, ngokutsho kweNAC, kwendiswa abantwana abangu-31 248, eNsiza abangu-20 872. Kukanti esigabeni seBulilima leMangwe kulabantwana abanengi abaphila legcikwane leHIV.
Lokhu kuvele kumbiko owethulwe ngumaneja weNAC eMatabeleland South uMnumzana Mgcini Sibanda.
Inhlanganiso yeNAC iveze ukuba eMatabeleland South, phakathi kwabantu abangu-750 000, abangu-100 000 baphila legcikwane leHIV. Kusibalo lesi, amankazana aleminyaka yokuzalwa ephakathi kwengu-15 le-24, yibo abanengi.
“I-Beitbridge iyakhokhela ngenani labantwana abazithwalayo. Lapha sikhuluma ngendawo ezigoqela iDite, Tongwe, Chasvingo leLutumba. Kulezi indawo inengi labantwana abangamankazana kalisahambi esikolo. Abanye ngabachapha umngcele besiya eSouth Africa, njalo baphatheka kumcimbi yebusuku, okubafaka engozini.
“Kulendawo ezisedolobheni leBeitbridge ezilenani elikhulu labantwana abendiswayo, ezibalisela eDulivadzimu, Khwalu, Madiginye, laseMabidi/Siyoka. Kulezi indawo, akulabazali abahlala labantwana,” kutsho uMnu Sibanda.
Ubike ukuba esigabeni seNsiza iziqinti lapho okubhahe khona ukwendiswa kwabantwana kuse-Alpha kuWard 13, Mpalawani laseKombo.
Umbiko kaMnu Sibanda uveze ukuba kulezi indawo izikolo ziyasilela njalo kuqakathekiswa amasiko lemikhuba encindezela abantwana abangamankazana.
“Izigaba zeBulilima leMangwe zihamba phambili ngegcikwane leHIV, kulandela iMzingwane,” kuchaza uMnu Sibanda.
