Online Reporter
Zimpapers Sports Hub
BEKUGCWELE phamu, kunyakazela eBarbourfields mhla iHighlanders idlala leScottland ngeSonto.
Kwangena abantu abangu-13 000, kuhlangene omama, labobaba labokhekhe. Kwavela ukuthi ekaMatshobane “yithimu yezwe lonke”.
Phakathi kwabantu laba, kwaba loyedwa owatshengisela ukuthi uyithanda kakhulu iBosso. Kwakungumntwana omncane, owakhanga amehlo abantu ngokungena phakathi kwenkundla.
Umntwana lo uze wabongwa liqembu ngoba libona ukuthi selithole umsekeli omutsha ozaqhubeka eyisekela iHighlanders kwelakusasa. NgoLwesibili inkokheli zeqembu zinxuse abazali balumntwana ukuthi baze laye emahofisini ezophiwa isipho sengowane lesikipa seqembu.
Ugatsha lwezokukhitshwa kwemibiko eqenjini lukhiphe umbiko ngokufika komntwana lo emahofisini.
“Isifikile indlovukazi encane! Sibe lenjabulo yokuhlangana lomlandeli wethu ohamba phambili. Simphathele isipho esincinyane sokumbonga. Sizakuba yisikhumbuzo salolu usuku oluqakathekileyo, siphinde simkhuthaze ukuthi aqhubeke ngokusisekela.
“Sihlabeke umxhwele ngamandla langedlabuzane alalo. Sifuna ukumbona ekhula esiba ngumlandeli weBosso otshisekayo, ozinikeleyo. Siyajabula ngokuba labalandeli abafana laye, futhi sibheke ngabomvu eminye iminyaka eminengi yokusekela lokwethembeka,” kutsho iHighlanders ibeka amazwi ayo enkundleni zokuxhumana ebulenjini.
Abacubunguli bomdlalo babike ukuba kwabajabulisa ukuthola ukuthi imuli sezikhululekile ukungena labantwana ebholeni, okuveza ukuthi inkundla yeBarbourfields ilokuphepha njalo injabulo yenguqu ngeyomuntu wonke, kungakhathalekile ukuthi ulemnyaka emingaki.
Labalandeli bakujabulele lokhu.
Omunye wabo, uDalu Vodloza ungene ekhasini yeHighlanders FC kuFacebook wathi: “Siyakwamukela enkundleni.”
Sports Grind with Buhle uthe: “Vumelani abantwana beze kimi, itsho njalo iBosso . . .”
U-Anele Phagiwa Ndlovu ubonge inkokheli zeqembu.
“Siyabonga badala ngomusa eliwutshengisileyo.”
Kusenjalo, imidlalo yeCastle Lager Premier Soccer League (PSL) iyaqhubeka kulimpelaviki.
Intshantshu iSimba Bhora, esuka kunqotshwa 1-0 yiDynamos lizabe linxuse eleTelOne enkundleni yeRufaro. Iqembu leli, eliqeqetshwa nguJoel Luphahla selinqobe kumdlalo owodwa, laba ngutshiki lobhanqa kabili, ladliwa kanye. Selithole imiklomelo emihlanu phakathi kwelitshumi lambili.
ULuphahla uthe bengena kumdlalo wabo leDynmos babelomthwalo onzima.
“Bekungelula. Sibelomnyama, unozinti wethu esenza amaphutha. Amaphutha ayenzeka. Umuntu kufanele enze iphutha ukuze kube lenguquko emdlaweni,” kutsho lumqeqetshi ekhuluma leZimpapers Sports Hub. Ngemva kokubambana leScottland, iBosso izangena umango isiyadlala leTriangle United eGibbo Stadium.
Imidlalo yeCastle Lager
ngeviki lesihlanu:
NgoMgqibelo: Manica Diamonds v Dynamos (Sakubva Stadium) , Chicken Inn v Herentals (Luveve Stadium) , Simba Bhora v TelOne (Wadzanayi Stadium), MWOS V ZPC Kariba (Baobab Stadium), Kwekwe United v FC Platinum (Bata Stadium), Greenfuel vs Yadah (Greenfuel Arena) Scottland v Bikita Minerals (Rufaro Stadium)
NgeSonto: Triangle United v Highlanders (Gibbo Stadium), CAPS United versus Ngezi Platinum Stars (Rufaro Stadium)
